Styrkja myndarlega glæpamanninn

Nú hefur verið opnuð sérstök söfnunarsíða til þess að safna pening handa Jeremy Meeks, en hann var handtekinn í síðustu viku í Stockton í Kaliforníu í Bandaríkjunum. Meeks, sem var handtekinn í tengsl­um við rann­sókn lög­regl­unn­ar á rán­um og skotárás­um, vakti mikla athygli eftir að lögreglan í Stockton birti mynd af manninum. Myndin er búin að fá rúmlega 95 þúsund „like“ á Facebook og búið er að skrifa við hana um 25 þúsund ummæli. Flestir sem tjá sig eru á því að Meeks sé myndarlegasti glæpamaður í heimi.

Ummæli eins og „...þessar varir“, „Gifstu mér Jeremy“ og „Kannski getum við breytt honum!“ voru sett við myndina. Þó voru nokkrir sem bentu fólki á að þetta væri nú dæmdur glæpamaður sem bæri að varast en ekki veita jákvæða athygli vegna þess hversu myndarlegur hann væri.

Móðir Meeks, Katherine Angier, hefur þó notfært sér þessa gífurlegu athygli og opnað söfnunarsíðu þar sem fólk getur styrkt Meeks og móður hans við að koma honum úr fangelsi. 

Angier segir m.a. á síðunni að sonur hennar sé fórnarlamb staðalímynda þar sem fólk dæmi hann fyrir húðflúr sem hann er með í andlitinu. Jafnframt heldur hún því fram að Meeks sé maður í vinnu sem tengist ekki glæpaklíkum á nokkurn hátt. 

Síðan var opnuð á fimmtudaginn og hafa nú safnast rúmlega 3500 dollarar eða tæp 400 þúsund íslenskra króna. 

Einn hættulegasti glæpamaður Stockton