Boris Johnson segir af sér
Alexander Kristjánsson
Setja bókamerki
Boris Johnson, utanríkisráðherra Bretlands, hefur sagt af sér. Fréttastofan Sky greinir frá þessu. Afsögnin kemur í kjölfar óánægju harðlínumanna í útgöngumálum með nýja áætlun stjórnar Theresu May um hvernig samskiptum Evrópusambandsins og Breta skuli háttað eftir útgönguna. Í gær sagði David Davis, ráðherra útgöngu úr Evrópusambandinu, af sér.
Í yfirlýsingu frá forsætisráðuneytinu segir að forsætisráðherrann hafi tekið við uppsagnarbréfi Boris Johnsonar í dag. „Arftaki hans verður kynntur innan skamms. Forsætisráðherrann þakkar Boris fyrir störf sín.“
Theresa May forsætisráðherra ávarpaði þingið klukkan hálfþrjú í dag til að greina frá útgöngustefnu stjórnarinnar, sem ráðherrarnir 26 í ríkisstjórn hennar komu sér saman um fyrir helgi.
May sagði eftir fundinn að ríkisstjórnin muni leitast eftir því að gera fríverslunarsamning við Evrópusambandið á sviði iðnaðar- og landbúnaðarframleiðslu og styddi auk þess sameiginlegt tollasvæði. Hið síðarnefnda verður þó að teljast langsótt í ljósi þess að Bretar munu einnig leitast eftir því að geta samið um eigin tolla við utanaðkomandi ríki.
Enn veikist May
Staða Theresu May sem forsætisráðherra þótti veik fyrir og ljóst er að ekki er hún betri nú. Íhaldsflokkurinn hefur ekki meirihluta á breska þinginu heldur reiðir sig á tíu þingmenn Norður-írska sambandsflokksins (DUP), íhaldsflokks sem vill úr ESB. Þá glímir hún við harðlínumenn í eigin flokki, sem vilja út úr tollabandalagi Evrópusambandsins, undan Evrópudómstólnum og hugnast ekki frjálst flæði fólks milli Evrópusambandsins og Bretlands.
Laura Kuenssberg, þingfréttaritari BBC, segir afsögn hans hafa snúið „vandræðalegu og erfiðu ástandi fyrir forsætisráðherrann í mögulega allsherjarkrísu“.
Boris hefur lengi verið nefndur sem mögulegt formannsefni Íhaldsmanna Margir bjuggust við því að hann gæfi kost á sér í embættið þegar kosið var um arftaka David Cameron, sem sagði af sér eftir að 51,9% Breta höfðu kosið að ganga úr Evrópusambandinu. Boris ákvað hins vegar að gefa ekki kost á sér og úr varð að Theresa May, fyrrum stuðningsmaður áframhaldandi aðildar (e. remainer) tók við formennsku og forsætisráðherrastöðunni.
Á vef Guardian er því velt upp hvort Boris muni leggja fram vantrautstillögu gegn May. Talið er ólíklegt að hann hefði betur í slíkri baráttu. Aðeins 129 þingmenn Íhaldsflokksins kusu með útgöngunni úr sambandinu, rétt rúm 40 prósent, og margir þeirra hafa efasemdir um þá sýn sem Boris Johnson hefur á útgönguna, „hart Brexit“, sem ríkisstjórnarliðar höfnuðu á fundinum afdrifaríka fyrir helgi.
Brexit hverfur ekki með stjórnmálamönnum
Á fjölmiðlafundi í gær sagði fjölmiðlafulltrúi framkvæmdastjórnar ESB, Margaritis Schinas, að afsögn Davis hefði engin áhrif á viðræður Breta og Evrópusambandsins. „Ekki hjá okkur. Við erum hér við vinnu.“
Þrátt fyrir slíkar yfirlýsingar verður að teljast hæpið að slík stólaskipti setji ekki strik í reikninginn í viðræðunum, sérstaklega nú þegar Boris Johnson er horfinn á braut. 263 dagar eru þar til Bretar ganga úr sambandinu, 29. mars 2019, og samkvæmt áætlunum breskra og evrópskra stjórnvalda á samkomulag um útgönguna að liggja fyrir í október.
Donald Tusk, forseti leiðtogaráðs Evrópusambandsins, sagði á Twitter að stjórnmálamenn komi og fari. Vandamálin sem þeir skapa fari þó verði þó um kjurrt. Hann sagðist aðeins sakna þess að hugmyndin um Brexit hafi ekki horfið með þeim. „Eða hvað?“ segir forsetinn að lokum, en hann hefur áður lýst því yfir að hann kveðji Breta með söknuði.
Fréttin hefur verið uppfærð
Sjötti ferðamaðurinn er látinn
/frimg/1/53/8/1530844.jpg)
Myndir: Náttúrulegur þröskuldur að taka við
Fullvissa ferðamenn um að hér sé öruggt
Hópur fólks reyndi að komast að eldgosinu
Þarf að koma til móts við ólíkar þarfir lækna
Viðræður ekkert þokast frá því á þriðjudag
Yfir 300 stæði fóru undir hraun