Theresa May, forsætisráðherra Bretlands, hefur skrifað bresku þjóðinni opið bréf þar sem hún hvetur landsmenn til að styðja Brexit-samkomulagið. Gert er ráð fyrir að leiðtogar ESB-ríkjanna samþykki útgöngusamninginn og yfirlýsinguna á fundi sem hefst í dag.

Leiðtogar Bretlands og Evrópusambandsins náðu á fimmtudaginn samkomulagi í meginatriðum um drög að yfirlýsingu um tengsl landsins við ESB eftir útgöngu þess úr sambandinu.

May segir í bréfinu að samkomulagið sé skref í átt að bjartari framtíð fyrir Bretland. Útgangan á næsta ári muni marka tímamót endurnýjunar og sáttar hjá bresku þjóðinni, að því er fram kemur á vef breska ríkisútvarpsins. 

Leiðtogar ESB-ríkjanna eru nú komnir í Brussel í Belgíu þar sem þeir munu taka afstöðu með eða á móti samkomulaginu.

Donald Tusk, forseti leiðtogaráðs Evrópusambandsins, hefur hvatt öllu aðildarríkin til að samþykkja samninginn. 

Spánverjar, sem höfðu hótað að sniðganga fundinn, munu senda sína fulltrúa til Belgíu í kjölfar deilu um Gíbraltar sem var leyst á síðustu stundu í gær. 

Fari það svo að leiðtogar ESB-ríkjanna leggi blessun sína yfir samkomulagið, þá á May eftir að fá breska þingið til að samþykkja samninginn. Margir breskir þingmenn, þar á meðal félagar May úr breska Íhaldsflokknum, hafa lýst því yfir að þeir muni greiða atkvæði gegn samkomulaginu. 

Tengdar fréttir

Brexit

Nigel Farage gefur kost á sér og leiðir flokk

• Verði auðveldara að fara til og frá Bretlandi
• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins

» Fleiri tengdar fréttir

• 2 blogg um fréttina

Bloggað um fréttina

• Páll Vilhjálmsson: Brexit og þriðji orkupakkinn
• Gústaf Adolf Skúlason: No way Mrs. May!