Theresa May, forsætisráðherra Bretlands og leiðtogi Íhaldsflokksins, hyggst segja af sér embætti þegar breska þingið hefur samþykkt útgöngusamning Bretlands og Evrópusambandsins um Brexit. 

Frá þessu greindi hún á fundi með þingflokki Íhaldsflokksins síðdegis. Ákvörðunina tekur hún til að greiða fyrir stuðningi innan Íhaldsflokksins við Brexit-samninginn, sem hefur tvívegis verið kolfelldur á þinginu. 

May segist vera tilbúin að láta af störfum fyrr en áætlað var þar sem það sé hið rétta í stöðunni, bæði fyrir bresku þjóðina og Íhaldsflokkinn. 

„Ég skynja mætavel stemninguna í þingflokknum. Ég veit að þingmenn hafa óskað eftir nýrri nálgun - og nýjum leiðtoga - í öðrum hluta Brexit-viðræðna og ég mun ekki standa í vegi fyrir því,“ segir May. 

May ætlar að halda ótrauð áfram og leggja samninginn fyrir þingið í þriðja skipti, þrátt fyrir að John Bercow, forseti þingsins, segir það ekki samræmast þingsköpum. 

Hér má fylgjast með beinni lýsingu Breska ríkisútvarpsins á því sem fram fer á breska þinginu í kvöld, en til stendur að greiða atkvæði um átta mögu­leg­ar leiðir til að finna lausn á fyr­ir­hugaðri út­göngu Bret­lands úr Evr­ópu­sam­band­inu.

Frétt af mbl.is

Breska þingið tekur ráðin af May

Upphaflega stóð til að Bretar segðu skilið við ESB á föstudag, 29. mars, en leiðtog­ar Evr­ópu­sam­bands­ins hafa samþykkt áætl­un um að fresta Brex­it. Meðal tillagna sem greidd verða atkvæði um í kvöld er að Bretland gangi úr ESB 12. apríl næstkomandi án samnings. Í annarri felst að draga til baka 50. grein Lissabon-sáttmálans sem felur í sér ótímabundna frestun á Brexit. 

Enn önnur tillagan felst svo í að samþykkja Brexit-samning May og leggja hann í þjóðaratkvæðagreiðslu. Möguleikarnir eru því fjölbreyttir og mun framhald Brexit skýrast að einhverju leyti í kvöld. 

Tengdar fréttir

Brexit

Nigel Farage gefur kost á sér og leiðir flokk

• Verði auðveldara að fara til og frá Bretlandi
• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins

» Fleiri tengdar fréttir

• 1 blogg um fréttina

Bloggað um fréttina

• G. Tómas Gunnarsson: Rétt ákvörðun hjá May