Fólk safnaðist saman á Ráðhústorgi á Akureyri síðdegis og þar eru nú hátt í 200 manns; viðstaddir berja trommur og annað þess háttar og blása í flautur. Fólkið vill með þessu sýna samstöðu með mótmælendum í höfuðborginni og krefst þess að ríkisstjórnin fari frá. Allt fer rólega fram á torginu.

Klukkan 20 hefst borgarafundur í Deiglunni þar sem ræða á um niðurskurð í menntamálum og þegar þeim fundi lýkur, líklega um kl. 22, er reiknað með því að fólk safnist saman á ný á Ráðhústorgi og haldi mótmælum áfram.

Hópur fólks hittist á Ráðhústorgi í gærkvöldi til þess að sýna mótmælendum í miðborg Reykjavíkur samstöðu, trommaði, flautaði og söng. Þar var kveikt bál.