Innlent | mbl | 15.4.2010 | 14:08

Björgólfur Thor gerir athugasemd við frétt

Björgólfur Thor Björgólfsson. mbl.is/Kristinn

Björgólfur Thor Björgólfsson hefur sent frá sér athugasemd vegna fréttar sem birt er í Fréttablaðinu í dag. Segir hann að öllu sé snúið á hvolf í fréttinni en í henni kemur fram að Björgólfsfeðgar hafi fengið hundrað milljarða lán mánuði fyrir hrunið.

Athugasemd Björgólfs Thors

„„Öllu er snúið á hvolf í frétt Fréttablaðsins í gær, þar sem fullyrt er í fyrirsögn að „Björgólfsfeðgar [hafi fengið] hundrað milljarða lán mánuði fyrir hrunið“. Í tveimur tilvikum er því haldið fram að tekið hafi verið lán, þegar svo var ekki. Í öðru tilvikinu var keypt krafa af Landsbankanum og í hinu fékk Björgólfur Thor greidda upp kröfu sem hann átti og lagði það fé inn í Straum til að styrkja bankann. Til viðbótar er lán vegna Actavis dregið inn í umfjöllunina, en það lán er í skilum og verður greitt upp að fullu.

Fréttablaðið heldur því fram að bankastjórn Landsbankans hafi samþykkt hátt lán til eignarhaldsfélagsins Samsonar í september 2008. Margoft hefur verið bent á, að ekki var um nýja lánveitingu að ræða. Landsbankinn átti háa kröfu á Eimskip vegna láns til móðurfélags ferðaþjónustufyrirtækisins XL Leisure Group. Samson keypti þá kröfu í viðleitni sinni að styðja við rekstur bankans. Hér er því um það að ræða að eigendur bankans leggja fram eignir til að styðja við bankann á erfiðum tímum, en ekki nýja lánveitingu eins og gefið er í skyn. Síðar gengu þessi kaup til baka og Landsbankinn því eins settur og fyrir kaupin.

Þá er því haldið fram að Björgólfur Thor hafi fengið lán frá Straumi í desember 2008. Þetta er alrangt. Hið rétta er að Björgólfur Thor fékk greitt til baka lán sem hann hafði veitt Novator One, sjóði í eigu Straums. Þetta fé lagði hann strax aftur til bankans, til að styrkja eiginfjárgrunn hans. Ljóst er að það fé er að mestu glatað.

Actavis lán verður gert upp að fullu

Því hefur verið haldið mjög á lofti og Fréttablaðið gerir það einnig í umfjöllun sinni, að lán til Björgólfs Thors vegna Actavis hafi verið tekið örfáum dögum fyrir fall Landsbankans. Staðreyndin er hins vegar sú, að dregið var á lánið í áföngum frá apríl fram í september 2008, eða sex mánuðum áður en bankakerfið hrundi. Lánið var nauðsynlegt til að tryggja áframhaldandi rekstur Actavis, en bæði Björgólfur Thor og Landsbankinn höfðu mikla hagsmuni af að svo yrði. Fyrir láninu voru því fullkomlega eðlilegar viðskiptalegar forsendur. Tryggingar fyrir láninu voru traustar, m.a. veð í Actavis. Lánið er í skilum og verður gert upp að fullu.

Vegna umfjöllunar um lánamál Björgólfs Thors Björgólfssonar í skýrslu rannsóknarnefndar Alþingis vinnur hann nú að samantekt um þau mál sem hann hyggst birta opinberlega innan tíðar. Hann var ekki kallaður fyrir rannsóknarnefndina og fékk ekki tækifæri til að svara fyrir sig eða gera grein fyrir sínum málum þar.

Björgólfur Thor vinnur nú að uppgjöri skulda sinna og mun gera betri grein fyrir því síðar. Eins og fram kom í grein hans í Fréttablaðinu á miðvikudag er ljóst að þótt miklar eignir hans renni strax til lánardrottna muni hann jafnframt starfa í þeirra þágu um ókomin ár, þar til hann hefur að fullu gert upp við þá," segir í yfirlýsingu sem Björgólfur Thor hefur sent á mbl.is.