Gosmökkurinn í Grímsvötnum sést vel á gervitunglamynd frá NASA, en mökkurinn fór í yfir 20 km hæð í gær.
Samkvæmt upplýsingum sérfræðinga Veðurstofunnar sem flugu nálægt gosstöðvunum í morgun hafði mökkurinn lækkað í um 15 km. Í dag hefur hann svo verið í um 10 km og svo aftur í 11 km. Ný veðursjá Veðurstofunnar sem var komið í nágrenni Eyjafjallajökuls sýnir þessa þróun.
Í fréttatilkynningu frá Veðurstofunni segir að staðfest sé að gosið í Grímsvötnum sé í sjálfri öskjunni nærri þeim stað sem gaus 2004. Síðast hljóp úr Grímsvötnum 31. október 2010, lítið vatn hefur safnast þar saman og þunnur ís er á öskjunni. Þegar gaus í Grímsvötnum 1998 og 2004 urðu jökulhlaup nokkru eftir að gos hófst. Ekki er talið að samsvarandi aðstæður séu uppi nú og því er ekki búist við jökulhlaupi.