Árekstur varð á Möðrudalsöræfum í dag, þegar rúta og bílaleigubíll skullu saman. Að sögn lögreglunnar á Egilstöðum urðu einhverjar skemmdir á báðum bifreiðum, en ökumenn og farþegar sluppu ómeiddir.
Rekja má óhappið til færðarinnar að sögn lögreglu, en mikil snjókoma hefur verið á Austurlandi í dag með hríðarbyl. Nánast er ófært innanbæjar á Egilsstöðum og milli staða á svæðinu og Fjarðarheiðin er lokuð.
Samkvæmt Veðurstofu tekur veðrinu ekki að slota norðaustan og austanlands fyrr en kemur fram á morguninn.