Innlent | mbl | 15.10.2012 | 21:10 | Uppfært 17.10.2012 9:10

Meirihluti á móti í meira en þrjú ár

Norden.org

Mikill meirihluti landsmanna hefur verið andvígur inngöngu í Evrópusambandið samkvæmt niðurstöðum allra þeirra skoðanakannana sem birtar hafa verið hér á landi síðan í byrjun ágúst 2009 eða í meira en þrjú ár, óháð því hvaða aðilar hafa gert þær eða fyrir hverja.

Niðurstöður nýrrar skoðanakönnunar voru birtar fyrr í dag en könnunin var gerð af Capacent Gallup fyrir Heimssýn, hreyfingu sjálfstæðissinna í Evrópumálum, en samkvæmt þeim eru nú 57,6% landsmanna andvíg inngöngu í Evrópusambandið en 27,3% hlynnt henni. Nokkuð er síðan afstaðan var síðast könnuð en það var í apríl síðastliðnum þegar skoðanakönnun sem gerð var af Félagsvísindastofnun Háskóla Íslands sýndi hliðstæðar niðurstöður. Andstaðan nú mælist þó 3,8% meiri en í þeirri könnun á kostnað óákveðinna.

Eins og áður segir hafa allar skoðanakannanir sem birtar hafa verið frá því að umsóknin um inngöngu í Evrópusambandið var send í lok júlí 2009 sýnt afgerandi meirihluta gegn því að gengið yrði í sambandið, en fyrsta könnunin sem sýndi slíka niðurstöðu var gerð af Capacent Gallup fyrir hugveituna Andríki í sama mánuði og umsóknin var send og niðurstöðurnar birtar 4. ágúst sama ár.

Einhverjar sveiflur hafa þó átt sér stað þó þær hafi aldrei verið miklar. Þannig mældist munurinn á milli andstæðra fylkinga mestur í mars 2010 en þá voru 60% andvíg inngöngu í Evrópusambandið og 24,4% hlynnt. Minnstur munurinn var hins vegar í júní 2011 þegar rúm 50% voru á móti inngöngu en 37,3% studdu hana (sjá meðfylgjandi línurit hér til hliðar).

Meirihluti gegn inngöngu, umsókn og evru

Einnig hafa verið gerðar skoðanakannanir um fleiri spurningar sem snúa að Evrópumálunum og þar á meðal um afstöðuna til umsóknarinnar sem slíkrar. Þær kannanir hafa verið nokkuð misvísandi og orðalag spurninganna virst skipta máli. Samkvæmt síðustu skoðanakönnun um afstöðuna til umsóknarinnar sem gerð var af Capacent Gallup fyrir Samtök iðnaðarins var ekki mikill munur á fylkingunum en meirihluti var fyrir því að draga umsóknina til baka eða 43,6% gegn 42,6%.

Þá hefur einnig verið spurt um afstöðu fólks til þess að skipta um gjaldmiðil á Íslandi og taka evruna upp í þeim tilgangi en síðast var gerð skoðanakönnun í þeim efnum í byrjun þessa árs af MMR fyrir Andríki sem sýndi 52% andvíg því en 28% samþykk.

Ef marka má síðustu skoðanakannanir sem gerðar hafa verið er meirihluti Íslendinga samkvæmt því andvígur inngöngu í Evrópusambandið, er hlynntur því að draga umsóknina um inngöngu til baka og vill ekki taka upp evru sem gjaldmiðil þjóðarinnar.

Skoðanakannanir um afstöðuna til inngöngu í ESB 2009-2012. Eina könnun vantar frá ágúst 2011 sem var þó ekki frábrugðin hinum. Einungis eru hins vegar til upplýsingar um þá sem tóku afstöðu með eða á móti í henni og því er hún ekki í sama formi og aðrar kannanir í línuritinu.