Karlmaður beraði sig við Háteigsskóla

Karlmaður beraði sig fyrir þremur nemendum í fjórða bekk Háteigsskóla við skólann í frímínútum í morgun. Málið er til rannsóknar hjá lögreglu og gátu börnin gefið greinargóða lýsingu á manninum.

Í bréfi sem Ásgeir Beinteinsson, skólastjóri Háteigsskóla, sendi foreldrum barna í skólanum í hádeginu kemur fram að nemendur hafi brugðist rétt við og kallað starfsmann á vettvang. Skólastjóri ræddi við börnin og gáfu þau greinargóða lýsingu á manninum og atvikinu.

Lögreglan var þegar kölluð til og kom hún fljótlega á vettvang. „Lögreglan vinnur úr málinu í samræmi við verklag og rannsóknarlögreglumaður hefur tekið við rannsókninni. Foreldrar allra nemenda í 4. bekk voru upplýstir um atvikið,“ segir í bréfi Ásgeirs.

Árni Þór Sæmundsson hjá lögreglunni á höfuðborgarsvæðinu staðfestir að málið sé í rannsókn en segir ekki unnt að gefa nánari upplýsingar að svo stöddu. Aðspurður segist hann ekki geta svarað því hvort lögreglan viti eða gruni um hvern var að ræða.

• Blogga um frétt