Hanna Birna Kristjánsdóttir, þingmaður Sjálfstæðisflokksins og fyrrverandi innanríkisráðherra, hefur ákveðið að gefa ekki kost á sér fyrir komandi þingkosningar. 

Þetta kemur fram í bréfi sem hún hefur sent samflokksmönnum sínum. Hanna Birna hefur setið á þingi frá árinu 2013 sem þingmaður Reykjavíkurkjördæmis suður. Hún var innanríkisráðherra 2013–2014.

„Nú, þegar Sjálfstæðisflokkurinn er að hefja undirbúning fyrir komandi alþingiskosningar, vil ég greina ykkur frá þeirri ákvörðun minni að gefa ekki kost á mér í þeim kosningum.

Ástæðan er einföld; mig langar að leita nýrra áskorana og nú er einfaldlega komið að þeim tímamótum í mínu lífi að ég tel rétt að nýta reynslu mina, orku og starfskrafta annars staðar en á vettvangi stjórnmálanna,“ segir Hanna Birna.

Hún tekur fram að þó að ástæðan sé einföld hafi endanleg ákvörðun ekki verið það. 

„Frá því ég man eftir mér hef ég haft mikinn áhuga á stjórnmálum og hef notið þess að vinna með ykkur og fyrir ykkur í þágu hugsjóna okkar í Sjálfstæðisflokknum. Ég er innilega þakklát fyrir þann mikla stuðning sem ég hef ítrekað notið meðal ykkar, stolt af þeim fjölbreyttu verkefnum sem þið hafið treyst mér fyrir og ánægð með þann árangur sem við höfum sameiginlega náð.   

En þó að þessi ákvörðun hafi verið tekin þá kveð ég ekki alveg strax. Ég mun klára það tímabil sem ég var kjörin til, fylgjast með kosningabaráttunni næstu mánuði úr aðeins meiri fjarlægð en oft áður og óska Sjálfstæðisflokknum góðs gengis í þeim mikilvægu verkefnum sem framundan eru,“ segir Hanna Birna.

Tengdar fréttir

Alþingiskosningar 2016

Brutu lög með SMS-skilaboðum

• Skýrslan var tilbúin fyrir kosningar
• Lítill stuðningur við ríkisstjórnina
• „Báknið byggt upp“
• Gaf frá sér formennsku í þremur nefndum

» Fleiri tengdar fréttir

• 1 blogg um fréttina

Bloggað um fréttina

• Óðinn Þórisson: Pólitískur andstæðingur Oddnýjar Harðardóttur kveður