Innlent | mbl | 22.9.2016 | 21:30 | Uppfært 23:44

Kári heitir hann, var það ekki?

Sigmundur í sjónvarpssal í kvöld. Skjáskot/RÚV

„Það heyrast háværar raddir úr íslensku samfélagi sem krefjast þess að við hlúum miklu betur að íslensku heilbrigðiskerfi. Ef þið endið í ríkisstjórn að loknum kosningum, hvernig hyggist þið móta stefnu og hrinda henni í framkvæmd, um heilbrigðismál á Íslandi, og hvernig ætlið þið að hunskast til að fjármagna hana að því marki sem samfélagið vill?“

Svo hljómaði spurning Kára Stefánssonar í sjónvarpssal Ríkissjónvarpsins, sem hann beindi að þeim tólf frambjóðendum sem þar voru saman komnir til kappræðna í kvöld.

„Og síðan, þegar þið svarið þessu, hvernig ætlist þið til að fólk trúi því að þið munið standa við það sem þið segið að kosningum loknum?“

Ekki eigi að byggja upp á umferðareyju

Óttarr Proppé sagði Íslendingum ekki hafa auðnast að mynda stefnu til langs tíma í heilbrigðismálum. Heilbrigðiskerfið hefði grotnað niður og mikilvægt væri að hefja grundvallarbreytingar á því.

„Til þess þarf að fá alla að borðinu, þverpólitíska sátt með bæði fagmönnum og almenningi.“

Sigmundur Davíð sagði að langt væri síðan Framsóknarflokkurinn hefði sett stefnu í þessum málum. Hann sagðist ekki hlynntur áframhaldandi samþjöppun heilbrigðisþjónustu, efla þyrfti hana á landsbyggðinni og að byggja þyrfti annan stóran spítala á höfuðborgarsvæðinu.

Þá sagðist hann ekki sammála spyrjandanum, „Kári heitir hann var það ekki?“ bætti hann við, um að áfram eigi að byggja upp Landspítalann „á umferðareyju.“

Sjá frétt mbl.is: Getur ekki beðist afsökunar á árásum fjölmiðla

„Hvernig ætlið þið að hunskast til að fjármagna hana að því marki sem samfélagið vill?“ spurði Kári. Skjáskot/RÚV

Efnahagur ráði aldrei aðgenginu

Bjarni Benediktsson formaður Sjálfstæðisflokks sagði að markmið sitt væri að efnahagur fólks ætti aldrei að ráða aðgengi að heilbrigðisþjónustu á Íslandi. Ríkið hefði fleiri hundruð milljarða bundna í fjármálakerfinu sem gætu farið í uppbyggingu þjónustunnar.

Oddný Harðardóttir sagði endurbætur heilbrigðiskerfisins vera klárlega stóra mál næsta kjörtímabilsins. Hún sagðist vilja Landspítalann áfram við Hringbraut. Fyrirsjáanlegur skortur væri á hjúkrunarfræðingum á næstu árum.

„Með réttri forgangsröðun er þetta allt saman mögulegt, og almenningur í landinu mun sjá til þess að við stöndum við þetta.“

Vilja taka markvisst á holum kerfisins

Kári Stefánsson tók þá aftur til máls og sagði vanta miklar fjárhæðir til reksturs heilbrigðiskerfisins næstu ár. Spurði hann Bjarna af hverju ekki væri sett meira fé í það á sama tíma og ríkisstjórnin væri að skila af sér öflugum ríkissjóði.

Bjarni sagði að örugglega væri hægt að ná betri árangri með tíu milljörðum til viðbótar í rekstur Landspítalans, líkt og Kári hefði bent á. Hann sagði flokk sinn vilja taka markvisst á þeim holum sem væru í kerfinu. Kostnaðarþátttaka sjúklinga ætti ekki að vera neins konar aðgangshindrun.

Tólf frambjóðendur í sjónvarpssal

Oddvitar þeirra tólf flokka sem boðað hafa framboð til Alþingiskosninga mættust í fyrsta skipti í sjónvarpskappræðum Ríkissjónvarpsins í kvöld. Stiklað var á stóru og oft farið hratt yfir sögu, enda tíminn knappur í tólf manna kappræðum.

Þeir sem mættu fyrir hönd flokka sem nú eru á þingi voru: Katrín Jakobsdóttir fyrir VG, Bjarni Benediktsson fyrir Sjálfstæðisflokk, Sigmundur Davíð Gunnlaugsson fyrir Framsóknarflokk, Oddný Harðardóttir fyrir Samfylkinguna, Óttarr Proppé fyrir Bjarta framtíð og Einar Brynjólfsson fyrir Pírata.

Auk þeirra voru í sjónvarpssal Benedikt Jóhannesson fyrir Viðreisn, Þorvaldur Þorvaldsson fyrir Alþýðufylkingu, Helga Þórðardóttir fyrir Dögun, Inga Sæland fyrir Flokk fólksins, Júlíus Valdimarsson fyrir Húmanista, og Helgi Helgason fyrir Þjóðfylkinguna.