Fengu annan úr Panamaskjölum í staðinn
Setja bókamerki
Tengdar fréttir
Panamaskjölin
Vefsíða bandaríska dagblaðsins The Washington Post greinir frá því að Íslendingar hafi bolað í burtu Sigmundi Davíð Gunnlaugssyni úr embætti forsætisráðherra vegna tengsla hans við aflandsfélag í Panama en í staðinn fengið annan forsætisráðherra sem einnig hafi komið við sögu í Panamaskjölunum.
„Aðeins tveimur dögum eftir að tilkynnt var um lekann á Panamaskjölunum sagði forsætisráðherann Sigmundur Davíð Gunnlaugsson af sér. Í skjölunum kom fram að eiginkona hans átti aflandsfélag sem tengdist bönkum sem féllu. Það er viðkvæmt mál í landi sem var á bjargbrúninni í efnahagskreppunni árið 2008,“ segir í grein The Washington Post.
„Þúsundir manna fóru út á götur og kröfðust þess að Gunnlaugsson viki úr embætti. Talið er að allt að 6,6% íslensku þjóðarinnar hafi tekið þátt í mótmælunum. Núna, rúmum níu mánuðum eftir að Panamaskjölin voru gerð opinber og tveimur mánuðum eftir snarpar kosningar, hafa Íslendingar loksins fengið staðgengil fyrir Gunnlaugsson. En þrátt fyrir mótmælin í apríl var nýi forsætisráðherrann einnig nefndur í Panamaskjölunum.“
Í greininni kemur fram að Bjarni Benediktsson hafi neitað að segja af sér, þrátt fyrir að sumar skoðanakannanir hafi bent til þess að meirihluti almennings hafi viljað það.
Í framhaldinu var talið að eins konar uppreisn gegn kerfinu yrði á Íslandi og virtist Pírataflokkurinn líklegur til að vinna kosningarnar. Það hafi aftur á móti ekki gerst því þeir fengu helmingi færri atkvæði en Sjálfstæðisflokkurinn.
Vefsíða breska ríkisútvarpsins, BBC, greinir frá því að nýja ríkisstjórnin hér á landi ætli að setja spurninguna um aðild að Evrópusambandinu aftur á dagskrá með því að láta þingið kjósa um hvort haldin verði þjóðaratkvæðagreiðsla um aðildina.
Þar kemur fram að kosning Breta um áframhaldandi aðild að ESB, Brexit, hafi ýtt undir aðrar leiðir til að eiga viðskipti við þjóðir Evrópusambandsins, líkt og gert hefur verið á Íslandi.
Reuters segir einnig frá því fyrirsögn að Íslendingar ætli að spyrja þingið hvort halda skuli þjóðaratkvæðagreiðslu um aðild að ESB.
Tengdar fréttir
Panamaskjölin
„Meira eða minna búið, þetta gos“
Umferðarslys á Reykjanesbraut
Gosið ekki „mjög aðlaðandi“ að sjá frá brautinni
„Man ekki eftir að grjót hafi lent á bíl áður“
Talsverð tíðindi í könnun Gallup í Reykjavík
Alvarlegra en mörg fyrri gos
Beindi byssu yfir höfuð björgunarsveitarmanns
Kvika komin mjög norðarlega: Færist nær brautinni
