Innlent | mbl | 8.5.2024 | 13:03

Dagur: „Framsetningin einhliða og ýkjukennd“

Dagur B. Eggertsson, formaður borgarráðs. mbl.is/Eggert Jóhannesson

Dagur B. Eggertsson, fyrrverandi borgarstjóri, svarar umfjöllun Maríu Sigrúnar Hilmarsdóttur, fréttamanni Rúv, um lóðsamninga borgarinnar við olíufélögin í Kastljósi í fyrrakvöld í löngum pistli á Facebook-síðu sinni.

Frétt af mbl.is

Sagði ekkert tortryggilegt við samningana

„Mér fannst framsetningin einhliða og ýkjukennd og þar með og því miður í mikilvægum atriðum röng. Það var svo undarleg upplifun að vera kynntur til leiks í myrku herbergi undir sorglegri eða dramatískri fiðlutónlist þar sem ég virtist vera að benda á eitthvað á blaði sem alls ekki væri þar,“ segir Dagur í færslu sinni.

Dagur rekur málið ítarlega í færslu sinni og þá nefnir hann innslag sem sýni samtal hans við Maríu Sigrúnu í fundarherbergi í ráðhúsinu.

Þetta er fullkomið

„Mig langar hins vegar að segja ykkur frá furðulegri persónulegri upplifun í tengslum við þáttinn og viðtalið sem var við mig tekið. Þetta er sannarlega ekki stærsta efnislega atriðið en situr ekki síður í mér. Já, ég er að tala um senuna þar sem við erum að fletta í blöðum.

María Sigrún bað mig um viðtal vegna undirbúnings þessarar umfjöllunar sem ég samþykkti strax, enda sjálfsagt. Hún vildi taka það í fundarherbergi í ráðhúsinu þannig að við mæltum okkur mót í borgarráðsherberginu. Mér fannst það þó nokkuð dimmt og sagði eitthvað á þá leið að við ættum auðvelt með að finna bjartari og betri stað. María sagði, „Nei, þetta er fullkomið.“

Dagur segir að viðtalið sem átti að vera hálftími hafi staðið yfir í einn og hálfan tíma. Hann segir að það og eitt hafi verið sérstakt en honum hafi fundist það fínt vegna þess að mjög margar spurningarnar sem settar voru fram byggðu á upplýsingum sem honum hafi fundist ýktar, ónámkvæmar eða jafnvel rangar. Honum hafi því fundist gott að geta komiðá framfæri svörum við því.

Frétt af mbl.is

„Verulega brugðið að sjá þennan þátt“

„Þarna kom svo þetta furðulega augnablik þegar María Sigrún fullyrti að það kæmi hvergi fram í gögnum borgarráðs í upphafi málsins að lóðahafar myndu geta byggt íbúðir á lóðunum þá forsendu að ekki þyrfti að borga viðbótarbyggingarréttargjald ef unnið yrði að skipulagi og teikningum fyrir íbúðir á bensínstöðvareitunum innan þriggja ára,“ segir Dagur ennfremur í færslunni.

Dagur segist hafa mótmælt þessu og hafi sagt sannarlega hafi verið skýrt og öllum hafi verið það ljóst, líka fulltrúum minnihlutans í borgarráði sem greitt hafi aðferðarfræðinni atkvæði sitt.

„María Sigrún sagði að þau væru á öðru máli. Ég svaraði eitthvað á þá leið að það væri ekki heil brú í því og það væri eitthvað sem sagt væri eftir á. "Samþykkt borgarráðs er alveg skýr hvað þetta varðar og öll gögn." María Sigrún rengir þetta og spyr mig: "Hvar sérðu það?" Ég færi mig að henni í viðtalinu og við blöðum í gögnunum og ég bendi henni meðal annars á staðinn þar sem þetta stendur. Hún segir hins vegar eitthvað á þá leið: "Af hverju stendur það ekki? Þeim fannst þetta ekki skýrt."

Fékk skrýtna tilfinningu

Dagur segir að honum hafi ekki fundist óeðlilegt að María Sigrún kyni ekki skil á öllu þessu í fimm ára gömlum gögnum borgarráðs og hún hafi gefið honum að hún myndi nota tímann eftir viðtalið og fara yfir þetta.

„Mér fannst hins vegar fráleitt að hún myndi nota þetta myndbrot eftir að hún legðist yfir gögnin. Ég fékk þó einhverja skrýtna tilfinningu með þetta allt saman og settist því strax niður eftir viðtalið og sendi henni tölvupóst þar sem ég klippti inn setningarnar sem hún sagðist ekki sjá og sagði að minnihlutinn vildi ekki kannast við,“ segir Dagur.

Hann segir að María Sigrún hafi haft í höndunum öll gögn sem sönnuðu að minnihlutinn í borgarstjórn hefði samþykkt aðferðafræði og upplegg samninganna við olíufélögin árið 2019.