Fram undan eru mjög áhugaverðir tímar, þar sem hægt verður að hrinda í framkvæmd mikilvægum samfélagsverkefnum á grunni þess mikla árangurs sem hefur náðst.

Framsóknarflokkurinn mun halda áfram á þeirri vegferð að búa til sanngjarnt samfélag, þar sem allir hafa tækifæri til að njóta sín. Sjálf vil ég taka þátt í þeirri vegferð og þess vegna býð ég mig fram til embættis varaformanns Framsóknarflokksins. Ég heiti því að leggja mig alla fram og vinna gott starf fyrir landsmenn alla fái ég til þess umboð.“

Í fréttaskýringu Agnesar Bragadóttur í Morgunblaðinu í gær virðist allt í járnum með það hvor þeirra Sigmundar Davíðs Gunnlaugssonar, formanns Framsóknarflokksins, og Sigurðar Inga Jóhannssonar, varaformanns Framsóknarflokksins og forsætisráðherra, verður kjörinn formaður flokksins á flokksþingi Framsóknarflokksins í dag og deilur milli fylkinga hafa bara harðnað undanfarna daga.

Af samtölum við framsóknarfólk út um land allt í vikunni, svo og þingmenn flokksins og fyrrverandi áhrifamenn í Framsóknarflokknum, er ekki hægt að draga aðra ályktun en þá, að líklega verði mjótt á munum í formannskjörinu, og framsóknarfólk veðjar ýmist á Sigmund Davíð eða Sigurð Inga.

„Flestir þeir sem rætt hefur verið við virðast því fylgjandi að Lilja Dögg Alfreðsdóttir utanríkisráðherra verði kjörin varaformaður flokksins, og þá er slík afstaða ekki bundin við það hvort framsóknarmenn styðja Sigmund Davíð eða Sigurð Inga til formanns. Eygló Harðardóttir, félags- og húsnæðismálaráðherra, hefur ákveðið að sækjast eftir varaformennsku í flokknum, verði Sigurður Ingi kjörinn formaður,“ segir í fréttaskýringu Agnesar.