Tottenham fór upp í fjórða sæti ensku úrvalsdeildarinnar í fótbolta með sigri á Luton á heimavelli sínum, 2:1, í dag.
Tahith Chong kom Luton yfir strax á 3. mínútu en Issa Kaboré jafnaði fyrir Tottenham með sjálfsmarki á 51. mínútu. Heung-min Son skoraði svo sigurmark Tottenham á 86. mínútu. Luton er dottið niður í fallsæti á markatölu.
Chelsea og Burnley skildu jöfn, 2:2, á heimavelli fyrrnefnda liðsins. Cole Palmer kom Chelsea yfir með marki úr víti á 44. mínútu og Lorenz Assignon fékk sitt annað gula og þar með rautt er hann gaf vítið.
Tíu leikmenn Burnley neituðu að gefast upp, því Josh Cullen jafnaði á 46. mínútu. Palmer kom Chelsea aftur yfir á 78. mínútu en enn neitaði Burnley að gefast upp, því Dara O‘Shea jafnaði á 81. mínútu og þar við sat.
Jóhann Berg Guðmundsson kom inn á hjá Burnley á 70. mínútu, en liðið er fjórum stigum frá öruggu sæti. Chelsea er í 11. sæti með 40 stig.
Sheffield United og Fulham skildu jöfn, 3:3, í ótrúlegum leik í Sheffield. João Palhinha kom Fulham yfir á 62. mínútu en Sheffield-liðið svaraði með tveimur mörkum frá Ben Brereton Díaz og einu frá Oliver McBurnie.
Bobby Decordova-Reid minnkaði muninn á 86. mínútu og Rodrigo Muniz tryggði Fulham eitt stig með marki í uppbótartíma. Sheffield United er sem fyrr í botnsætinu með aðeins 15 stig. Fulham er í 12. sæti með 39 stig.
Bournemouth vann Everton á dramatískan hátt, 2:1, á heimavelli. Dominic Solanke kom Bournemouth yfir á 64. mínútu, en Beto jafnaði á 87. mínútu. Bournemouth átti hins vegar lokaorðið því Séamus Coleman skoraði sjálfsmark í uppbótartíma.
Nottingham Forest og Crystal Palace skildu jöfn, 1:1. Jean-Philippe Mateta kom Palace yfir á 11. mínútu en Chris Wood jafnaði fyrir Forest á 61. mínútu. Forest er fyrir ofan Luton og fallsæti á markatölu.