Nýtt lag með Sálinni hans Jóns míns, „Aldrei liðið betur", verður frumflutt í útvarpi um helgina. Sveitin hélt sig til hlés nær allt síðasta ár, en hyggst nú senda frá sér nýja plötu í októbermánuði. Fyrsta lagið sem samið var á plötuna, „Tíminn og við", var frumflutt í október í fyrra, en „Aldrei liðið betur" verður einnig á plötunni.
Lagið er eftir Guðmund Jónsson og textinn eftir Stefán Hilmarsson. Stefán segir að það sé í léttari dúr en Sálin hafi verið þekkt fyrir upp á síðkastið. „Við höfum verið svolítið dramatískir að undanförnu, en þeir sem hlýtt hafa á þetta lag segja að það líkist því sem við gerðum í gamla daga. Væntanlega verður næsta plata í þessum stíl; aðeins rólegri í dramatíkinni," segir Stefán.
Lúðrablástur er mjög áberandi í nýja laginu, en „hinn þokkafulli Samúel Samúelsson var fenginn til að setja út lúðrapartana og blæs þá ásamt Kjartani Hákonarsyni, félaga sínum úr Jagúar. Og að sjálfsögðu er það Jens Hansson sem er þriðja hjólið undir blástursvagninum", segir í fréttatilkynningu frá Sálinni.
Hægt er að hlýða á nýja lagið á vefsvæði Sálarinnar: www.salinhansjonsmins.is, en einnig er þar að finna ýmsan fróðleik um sveitina.