Hljómsveitinni sögufrægu, Pink Floyd, hafa verið boðnar 100 milljónir punda, jafnvirði um 11,6 milljarða króna, fyrir að fara í tónleikaferð um Bandaríkin. Hljómsveitin, sem kom fram á Live 8 tónleikunum sl. laugardag í fyrsta skipti í aldarfjórðung, hefur hafnað boðinu, að því er breska blaðið The Sun skýrir frá í dag.
Blaðið hefur eftir David Gilmore, gítarleikara Pink Floyd, að aðeins hafi staðið til að koma fram í þetta eina skipti. Hann segist einnig telja að ef plötusala tiltekinna sveita og tónlistarmanna aukist vegna athyglinnar sem Live 8 tónleikarnir vöktu á þeim, eigi viðkomandi að gefa umframhagnaðinn til góðgerðarmála.
„Ég mun ekki hagnast af tónleikunum. Ef leiðtogar átta helstu iðnríkjanna merkja í rétta reiti í Gleneagles í vikunni er tilganginum náð," hefur blaðið eftir Gilmore.
Hljómplötuverslanakeðjan HMV segir að sala á plötum Pink Floyd hafi aukist um 1343% eftir tónleikana á laugardag. Sala á plötum The Who hefur aukist um 863%, sala á plötum Annie Lennox jókst um 500% og á plötum Dido um 412%.