Það var mikið fjör í íþróttahöllinni á Húsavík í gærkvöldi þegar á sjötta hundrað unglinga af norðurlandi komu saman á söngkeppni SAMFÉS. Alls tóku þátt í keppninni sautján félagsmiðstöðvar á Norðurlandi en um undankeppni er að ræða og komust fimm hljómsveitir áfram í aðalkeppnina sem fer fram í Reykjavík í mars.
Það er greinilega fjöldinn allur af hæfileikaríkum ungmennum á norðurlandi og ljóst að dómnefnd var vandi á höndum þegar kom að úrslitunum.
Þær félagsmiðstöðvar sem komust áfram voru Pleizið á Dalvík, Himnaríki á Akureyri, Hyldýpið í Eyjafjarðarsveit, Beisið á Kópaskeri sem þótti hafa athyglisverðustu framkomuna og Gryfjan á Grenivík sem var með bestu framkomuna.