Fundinn sekur um að hafa lagt á ráðin um að myrða Bush

Alríkisdómstóll í Bandaríkjunum fann í dag 24 ára Bandaríkjamann, Ahmed Omar Abu Ali, sekan um aðild að hryðjuverkasamtökunum al-Qaeda og samsæri um að ráða George W. Bush Bandaríkjaforseta af dögum. Kviðdómur hafnaði fullyrðingu verjenda mannsins um að yfirvöld í Sádí-Arabíu hafi beitt hann pyntingum til að knýja fram játningu. Maðurinn á yfir höfði sér ævilanga fangelsisvist.

Abu Ali er bandarísku ríkisborgari af jórdönsku bergi brotinn. Hann ólst upp í Virginíu. Hann var handtekinn í Medina-háskóla í Sádí-Arabíu í júní 2003. Skömmu eftir handtökuna játaði hann að hafa gengið til liðs við al-Qaeda og rætt við liðsmenn samtakanna um ýmsar hryðjuverkaáætlanir, þar á meðal að sjá sjálfur um að ráða Bush af dögum og gerast leiðtogi al-Qaeda-hóps í Bandaríkjunum.

Verjendur Abu Alis héldu því fram að sádí-arabíska leyniþjónustan, Mubahith, hefði pyntað hann. Það tók kviðdóm tvo og hálfan dag að kveða upp úrskurð.

Ahmed Omar Abu Ali. AP

• Blogga um frétt