Knattspyrnusamband Íslands, KSÍ, hefur tilkynnt um breytingar á leikvöllum í Bestu deild kvenna vegna vallaraðstæðna.
Leikur FH og Þórs/KA í annarri umferð deildarinnar á laugardaginn hefur verið færður úr Kaplakrika á Ásvelli þar sem Kaplakrikavöllur er ekki tilbúinn til notkunar.
Þá er búið að víxla heimaleikjum Tindastóls og Breiðabliks, en leikurinn í annarri umferð á laugardag átti upphaflega að fara fram á Sauðárkróksvelli. Leikurinn getur ekki farið fram á honum vegna viðgerða.
Þess í stað fer hann fram á Kópavogsvelli og síðari leikur liðanna í Bestu deildinni á Sauðárkróksvelli þann 2. júlí næstkomandi.
Um síðustu helgi var Sauðárkróksvöllur á floti, sem þýddi að fresta þurfti leik Tindastóls gegn FH um einn sólarhring.
Eftir leysingar mátti sjá hvernig völlurinn var bylgjóttur og er nú unnið að lagfæringu.