Karlalið Hauka í knattspyrnu hefur fengið tvo uppalda leikmenn til liðs við félagið frá félögum sem leika í Bestu deildinni.
Hallur Húni Þorsteinsson hefur skipt alfarið til Hauka frá Fylki eftir að hafa leikið sem lánsmaður hjá liðinu á síðasta tímabili.
Óliver Steinar Guðmundsson er sömuleiðis genginn í raðir Hauka frá Val.
Hallur er 21 árs bakvörður og Óliver Steinar er 19 ára miðjumaður.
Hallur Húni á að baki einn leik með Fylki í efstu deild og níu í 1. deild, auk eins leiks í 1. deild fyrir Hauka og tíu í 2. deild á síðasta tímabili.
Óliver Steinar lék einn bikarleik fyrir Val á síðasta tímabili og á einn leik í 2. deild fyrir Hauka. Hann var um skeið á mála hjá Atalanta á Ítalíu.
Haukar eru stórhuga fyrir komandi tímabil en Ian Jeffs var ráðinn þjálfari liðsins fyrir tímabilið eftir að hafa náð góðum árangri með Þrótti úr Reykjavík í tvö ár á undan. Haukar enduðu í 7. sæti 2. deildar í fyrra.