Pearson rekinn frá Leicester

Óvænt tíðindi bárust úr herbúðum enska úrvalsdeildarfélagsins Leicester nú undir kvöld en félagið hefur rekið knattspyrnustjórann Nigel Pearson.

Pearson náði að halda Leicester í úrvalsdeildinni á síðustu leiktíð og gott betur en liðið hafnaði í 14. sæti. Það náði í 22 stig af 30 mögulegum í síðustu tíu leikjum tímabilsins og því virðist ljóst að árangur síðasta vetrar hafði ekkert með brottreksturinn að gera.

Í tilkynningu Leicester segir að sambandið á milli stjórnar og Pearsons hafi verið komið á endastöð.

Í júní var James, sonur Pearson, rekinn frá Leicester ásamt tveimur öðrum leikmönnum vegna kynlífsmyndbands sem birtist eftir ferð liðsins til Tælands. Á myndbandinu sáust leikmennirnir taka þátt í hópkynlífi ásamt því að beita tælenska stúlku kynþáttaníði.

• Blogga um frétt