Tveir 1. deildar slagir fóru fram í 32-liða úrslitum bikarkeppni karla í fótbolta í dag. Afturelding sigraði Dalvík og Þór gerði góða ferð á Seltjarnarnes.
Afturelding tók á móti Dalvík/Reyni á Varmárvelli en norðanmenn eru nýliðar í 1. deild. Heimamenn komust yfir undir lok fyrri hálfleiks með marki Hrannars Snæs Magnússonar. Staðan 1:0 í hálfleik.
Patrekur Orri Guðjónsson kom Mosfellingum í 2:0 áður en Tómas Þórðarson minnkaði muninn fyrir Dalvík/Reyni. Patrekur Orri skoraði annað mark sitt eftir sendingu Arons Elís Sævarssonar áður en Elmar Kári Cogic innsiglaði sigur Aftureldingar Niðurstaðan 4:1.
Þórsarar frá Akureyri mættu Gróttumönnum á Seltjarnarnesi og jafnræði var með liðunum í fyrri hálfleik en á 55. mínútu fékk Tareq Shihab sitt annað gula spjald í liði heimamanna.
Þórsarar nýttu sér liðsmuninn og Rafael Victor skoraði tvö mörk fyrir Þór áður en Bjarki Þór Viðarsson leikmaður Þórs fékk rautt spjald á 84. mínútu. Tveimur mínútum síðar skoraði Fannar Malmquist Gíslason þriðja mark Þórs og enduðu leikar 3:0 fyrir Þór sem verða í pottinum þegar dregið verður í 16-liða úrslit.