Evran ekki ódýrari í 7 mánuði

Gengi krónu hefur styrkst frá miðjum júlí síðastliðnum eftir nær samfellda veikingu frá nóvember á síðasta ári. Raunar hefur evran ekki verið ódýrari í krónum talið frá ofanverðum febrúar, en hún kostar 160 krónur.

Gagnvart körfu helstu viðskiptamynta er gengi krónu svipað og í maíbyrjun eftir ríflega 2% styrkingu frá miðjum júlí. Styrkingin gagnvart evru á sama tímabili nemur hins vegar 3,7%, enda hefur evran gefið verulega eftir gagnvart helstu gjaldmiðlum það sem af er septembermánuði eftir því sem skuldakreppa Grikklands og fleiri Suður-Evrópuríkja hefur magnast, segir í Morgunkorni Greiningar Íslandsbanka.

„Mikil árstíðasveifla er í gjaldeyrisinnflæði vegna þjónustuviðskipta við útlönd, þar sem tekjur af erlendum ferðamönnum eru til muna mestar á 3. ársfjórðungi. Þetta innflæði skilar sér þar að auki meira og minna beint inn á gjaldeyrismarkað, öfugt við það sem stundum virðist vera raunin með gjaldeyrisinnstreymi frá vöruútflutningi. Hins vegar er nú farið að síga á seinni hluta ferðamannatímans hér á landi og innflæði gjaldeyris vegna ferðamanna fer því hjaðnandi jafnt og þétt næstu vikur og mánuði," segir í Morgunkorni Íslandsbanka.

Seðlabankinn hefur frá ágúst í fyrra keypt gjaldeyri af bönkunum í viku hverri, og hefur fjárhæðin numið 1,5 m. evra á viku. Peningastefnunefnd bankans velti því raunar fyrir sér á síðasta vaxtaákvörðunarfundi hvort þessi gjaldeyriskaup hefðu haldið aftur af gengishækkun krónu á fyrri hluta ársins.

„Verður forvitnilegt að sjá hvort það muni haldast í hendur á síðustu mánuðum ársins að velta á millibankamarkaði minnkar að nýju og gengi krónu gefur eftir að nýju samfara minna árstíðabundnu innflæði gjaldeyris."

• Blogga um frétt