Viðskiptajöfnuður við útlönd mældist hagstæður um 11,7 milljarða króna á þriðja ársfjórðungi samanborið við 32,1 milljarða óhagstæðan jöfnuð fjórðunginn á undan.
Þetta kemur fram í tölum frá Seðlabanka Íslands. Afgangur af vöruskiptum við útlönd var 33,5 milljarðar og 27,3 milljarðar á þjónustuviðskiptum. Jöfnuður þáttatekna var hinsvegar neikvæður um 47,6 milljarða.
Halla á þáttatekjum má eins og áður rekja til innlánsstofnana í slitameðferð. Reiknuð gjöld vegna þeirra námu 44,4 milljarðar og tekjur 17 milljarðar. Jöfnuður þáttatekna án áhrifa innlánsstofnana í slitameðferð var óhagstæður um 21,6 milljarðar og viðskiptajöfnuður hagstæður um 39,1 milljarðar.
Erlendar eignir þjóðarbúsins námu 4.529 milljarðar í lok ársfjórðungsins en skuldir 13.671 milljarðar. Hrein staða við útlönd var því neikvæð um 9.142 milljarða og lækka nettóskuldir um 361 milljarð á milli ársfjórðunga. Að frátöldum innlánsstofnunum í slitameðferð námu eignir þjóðarbúsins 2.529 milljarðar og skuldir 3.361 milljarðar og var hrein staða þá neikvæð um 833 milljarðar.