Atvinnuleysi aldrei meira í evrulöndum

Meðalatvinnuleysi í evrulöndunum mældist 11,2% í júní og hefur aldrei verið meira síðan mælingar hófust 1995 að því er fram kemur í tölum Eurostat. Fjölgaði atvinnulausum um 123 þúsund frá fyrri mánuði eða um 0,1% og eru nú 17,8 milljónir án atvinnu á evrusvæðinu. Kemur fram í frétt Wall Street Journal að þessi þróun sé að grafa undan kaupmætti heimilanna; það dragi svo í framhaldinu úr smásölu og sé þannig vítahringur samdráttar.

Þróun atvinnuleysis hefur verið niður á við í flestum evrulöndum síðustu mánuðina, en mishratt þó. Á Spáni er t.d. um fjórðungur atvinnulaus en 6,8% eru án atvinnu í Þýskalandi. Hefur síðustu mánuði fjölgað örlítið á skrá yfir atvinnulausa þar, en ekkert í samanburði við önnur lönd sunnar í álfunni. Mettölur þessa mánaðar bætast við mettölur frá síðasta mánuði, en það virðist ganga hægt að snúa efnahagnum við og fjölga störfum.

• 3 blogg um fréttina

Bloggað um fréttina

• Guðrún María Óskarsdóttir.: Yfirdrifinn Evrópumarkaðshyggja, með tvöföldu stjórnkerfi sambandsþjóða.
• Samtök um rannsóknir á ESB ...: Traustið á ESB í sögulegu lágmarki
• Páll Vilhjálmsson: Evra = atvinnuleysi og ójöfnuður