Evrópusambandið hyggst sekta bandaríska tæknifyrirtækið Apple um 500 milljónir evra fyrir að hafa brotið Evrópulög. Upphæðin samsvarar tæpum 74 milljörðum íslenskra króna. Búist er við að Evrópusambandið tilkynni sektina í byrjun næsta mánaðar.
Bandaríski miðillinn Financial Times greinir frá. Miðillinn hefur þessar upplýsingar eftir fimm einstaklingum sem komu að rannsókn málsins.
Rannsóknin snýr að því hvort Apple hafi hindrað forrit í að upplýsa iPhone-notendur um ódýrari valkosti, utan App Store, sem veita aðgang að tónlistaráskriftum. Rannsóknin hófst eftir að tónlistarstreymisveitan Spotify lagði fram formlega kvörtun árið 2019. Samkvæmt heimildum Financial Times telur Evrópusambandið aðgerðir Apple ólöglegar og stríða gegn reglum þess um samkeppni á innri markaðnum.
Apple hefur aldrei áður verið sektað fyrir brot á samkeppnislögum Evrópusambandsins. Árið 2020 sektuðu samkeppnisyfirvöld í Frakklandi hins vegar Apple um 1,1 milljarð evra, sem svarar til 166 milljarða króna, fyrir brot á samkeppnislögum. Brotin snéru að viðskiptaháttum Apple í garð dreifingaraðila. Eftir áfrýjun málsins var upphæðin lækkuð niður í 372 milljónir evra, sem er um 55 milljarðar króna.