Mun ekki segja af sér embætti

Arn­ald­ur Bárðar­son­, for­maður Presta­fé­lags Íslands (PÍ), ætlar ekki að verða við ákalli Fé­lags prest­vígðra kvenna um að hann segi af sér embætti vegna vanhæfis.

Fé­lag prest­vígðra kvenna fór fram á af­sögn Arn­ald­ar í vikunni þar sem þær telja for­mann­inn van­hæf­an til að gæta hags­muna alls fé­lags­fólks. Telja þær hann hafa tekið meðvitaða af­stöðu með ger­anda í of­beld­is­máli. 

Frétt af mbl.is

Krefjast afsagnar formanns Prestafélags Íslands

Ofbeldismálið sem um ræðir er mál Gunn­ars Sig­ur­jóns­sonar, fyrrverandi sókn­ar­prests í Digra­nes­kirkju. Niðurstaða teymis Þjóðkirkjunnar, sem greint var frá í vikunni, er sú að Gunnar hafi í tíu til­vik­um verið upp­vís að hátt­semi sem stríði gegn ákvæðum reglu­gerðar Þjóðkirkj­unn­ar um einelti, kyn­bundna áreitni, kyn­ferðis­lega áreitni og of­beldi.

Frétt af mbl.is

Gunnar varð uppvís að kynferðislegri áreitni

„Félag prestvígðra kvenna er ákaflega mikilvægur hópur innan Prestafélags Íslands og ég heyri hvað þær segja. Hins vegar hefur málið marga fleti og ég sem formaður reyni að gæta hagsmuna félagsmanna í hvívetna. Ég var kjörinn til þess á aðalfundi og það hefur í sjálfu sér ekkert breyst að ég mun halda áfram að gæta hagsmuna í þessu stéttarfélagi,“ segir Arnaldur í samtali við mbl.is.

Þú ert í raun að segja að þú sért ekki að fara segja af þér?

„Ég er ekki að fara segja af mér. Ég mun hins vegar boða til félagsfundar þar sem að félagsmenn geta rætt málin. Ég tel að það sé mjög mikilvægt að þarna eigi sér stað upplýst góð umræða. Mikilvægt er núna að kalla eftir að öll gögn málsins komi fram. 

Ég hef kallað eftir niðurstöðu teymisins frá Biskupsstofu. Því hefur verið hafnað. Ég skora á biskup Íslands að birta skýrsluna sem unnin var í máli presta í Hjalla- og Digraneskirkju. Ég trúi á opna umræðu. Við erum stærsta lýðræðishreyfing landsins, Þjóðkirkjan, og þar eiga öll mál að vera uppi á borðinu,“ segir Arnaldur.

Bætir hann við að í samtölum sínum við geranda og þolendur málsins hafi komið fram að allir vilji að skýrslan verði gerð opinber. Þjóðkirkjan segi hins vegar að hún sé bundin trúnaði við hlutaðeigendur og vilji því ekki gera hana opinbera.

Hafi ekki tekið afstöðu með geranda

Spurður út í ásakanir Félags prestvígðra kvenna, um að hann hafi tekið afstöðu með gerandanum og gert lítið úr trú­verðug­leika teym­is­ins sem vann skýrsluna, segir Arnaldur:

„Ég vísa því sem kemur þarna fram algjörlega á bug. Það eru hrein ósannindi að ég hafi reynt að gera lítið úr teyminu eða villt á mér heimildir eða að ég hafi tekið afstöðu með einum aðila gegn öðrum.“

• 1 blogg um fréttina

Bloggað um fréttina

• Guðjón E. Hreinberg: Kristin kirkja lög niður á Íslandi