Orlofsuppbót starfsfólks hækkar

Samkomulag hefur náðst á milli verkalýðsfélagsins Einingar-Iðju og Samherja um fjölda orlofsdaga og hækkun orlofsuppbótar starfsfólks í landvinnslum Samherja.

Samkomulagið felur í sér að starfsfólki sem er í fullu starfi 30. apríl næstkomandi, verður tryggður fullur orlofsréttur á yfirstandandi orlofsári. Þar að auki fá starfsmenn sérstaka orlofsuppbót að upphæð 103.500 krónur til viðbótar við umsamda 46.500 króna orlofsuppbót, að því er kemur fram á vefsíðu Einingar-Iðju.

Þar segist Björn Snæbjörnsson, formaður Einingar-Iðju, vera ánægður með framgöngu Samherja í málinu og er hann mjög sáttur við samkomulagið.

Forstjóri Samherja, Þorsteinn Már Baldvinsson, segir að sjómannaverkfallið hafi komið á erfiðum árstíma fyrir starfsfólkið og hafi verið langt. „Ég er þakklátur fyrir að okkar ágæta starfsfólk hafi skilað sér til baka að loknu verkfalli sem var ekki sjálfgefið. Samstarfið við forsvarsmenn Einingar-Iðju og trúnaðarmenn starfsmanna var gott og þökkum við fyrir það,“ segir hann á vefsíðunni.

• Blogga um frétt