Stóraukin umsvif Marels í Ástralíu

Umsvif Marels í Eyjaálfu hafa farið stigvaxandi og er félagið nú leiðandi í sölu á búnaði á sumum sviðum matvælageirans syðra.

Jonathan Rankin, framkvæmdastjóri Marels í Eyjaálfu, sýndi blaðamanni höfuðstöðvar félagsins í Brisbane. Þá var farið að hausta syðra um páskana.

Brisbane er höfuðborg Queensland á austurströnd Ástralíu. Að auki er Marel með starfsmenn í Sydney, Melbourne og Tasmaníu og í Auckland og Christchurch á Nýja-Sjálandi. Félagið er því nærri viðskiptavinum í þessari stóru álfu.

Starfsmennirnir eru rúmlega 40 í Ástralíu en 11 á Nýja-Sjálandi. Það er mikil fjölgun frá árinu 2010. Veltutölur eru trúnaðarmál.

Sterk staða í sjávarútvegi

„Ástralía og Nýja-Sjáland eru í Eyjaálfu. Við erum þar með sameiginlegan rekstur. Það hefur verið mikill vöxtur hjá Marel á markaðnum. Sjávarútvegurinn hefur verið traustur markaður, sérstaklega markaðurinn með lax.

Við höfum líka séð verulegan vöxt í fuglakjöti þar sem við bjóðum afar sjálfvirkar lausnir. Kjötvinnslur bjóða upp á mikilvæg tækifæri fyrir Marel í þessum hluta heimsins og þar hefur hlutdeild Marels farið vaxandi,“ segir Rankin. Marel sé orðið leiðandi í sjávarútvegi. Hlutdeild félagsins í laxi sé um 80%.

Laxinn tilbúinn til eldunar í áströlskum stórmarkaði. mbl.is/Baldur

Krafa um aukna framleiðni

„Markaður fyrir lax fer vaxandi í Eyjaálfu og það hefur skapað tækifæri fyrir Marel. Þessir geirar þurfa að hámarka framleiðni og skilvirkni og Marel vinnur með félögunum að þeim markmiðum.“

Rankin segir aðspurður að 5-6 félög séu ráðandi í vinnslu á laxi í Eyjaálfu. Umfangið sé mest í Tasmaníu. Þótt nokkrar vinnslustöðvar séu fyrir lax á Nýja-Sjálandi sé vinnslan mest í hvítfiski. Þar séu enda stærri stofnar af villtum fiski, einkum hokinhala, en í Ástralíu.

Rankin segir tvö félög ráðandi í fuglakjöti í Ástralíu. Þar af sé annað félagið jafnframt ráðandi á nýsjálenska markaðnum. Hann segir mikla hagræðingu hafa farið fram í þessum geira á síðustu fimm árum. Fyrirtækin hafi fjárfest mikið í tækni og leitað leiða til að auka skilvirkni og sjálfvirkni. Vinnuafl sé dýrt í þessum heimshluta og í sumum tilvikum sé erfitt að finna fólk sem vill starfa í vinnslustöðvum.

„Þetta er áskorun fyrir prótíniðnaðinn og því þarf sjálfvirkni að brúa bilið. Marel býður upp á búnað fyrir alla framleiðslukeðjuna, allt frá útungunarstöð til stórmarkaðarins.“

Rankin segir kröfur neytenda um skurð og skammtastærðir farnar að hafa mótandi áhrif á þróunina í kjötiðnaði, framleiðslu á fuglakjöti og í sjávarútvegi. Neytendur vilji vöru sem hægt sé að matreiða með sem minnstri fyrirhöfn.

„Neytendur gera orðið meiri kröfur. Krafan um aukin þægindi á þátt í þessari þróun. Það má sjá að vinnslurnar eru að færa sig ofar í virðiskeðjuna, fremur en að leggja áherslu á magn. Krafan um mikil gæði er þar mikill hvati og það má sjá í öllum geirum. Þessi þróun hefur aftur knúið mikinn vöxt hjá Marel,“ segir Rankin.

Höfuðstöðvarnar í Brisbane. Starfsmenn Marels í Eyjaálfu eru orðnir rúmlega 50. Þeim hefur fjölgað ört síðustu ár. mbl.is/Baldur

Vinna með matvörukeðjum

Hann bendir svo á að síðustu 2-3 ár hafi nokkrar matvörukeðjur þróað eigin vinnslustöðvar. Marel hafi komið þar mikið við sögu. Þá bæði tækjabúnaður frá Marel og Innova-hugbúnaðurinn sem veiti gögn í rauntíma um framleiðsluna, framleiðni, afköst og gæði vörunnar.

Rankin segir aðspurður að Marel sé því farið að hafa veruleg áhrif á þróun matvælaiðnaðar í Ástralíu.

Það séu verulegar líkur á að Marel hafi komið við sögu þegar neytendur kaupa kjöt, fisk og fuglakjöt í ástralskri matvöruverslun. Marel sé nú leiðandi á þessu sviði í Eyjaálfu.

Miklu getur munað á verðinu

Rankin segir tækni frá Marel meðal annars nýtast til að hámarka arðsemi í kjötvinnslu. Kílóverðið geti til dæmis verið frá 5 og upp í 40 dollara og því skipti nýtingin miklu máli. Hann segir Marel orðið leiðandi í þeim hluta kjötiðnaðarins sem sé orðinn tæknivæddur. Þar bíði mikil tækifæri fyrir Marel. Innova-hugbúnaðurinn eigi þátt í því.