Hnúðlax náðist í net í Patreksfirði

Hnúðlax hefur veiðst í net í Patreksfirði. Var fiskurinn fallegur og án áverka, með engin bitför og alla ugga heila, að því er fram kemur á vef Náttúrustofu Vestfjarða.

Segir þar að laxinn hafi fundist við sýnatöku stofunnar þann 30. júlí, en á sunnanverðum Vestfjörðum eru sýnatökurnar gerðar í samstarfi við Evu Dögg Jóhannesdóttur, sem vinnur að meistaraverkefni þessu tengdu.

Hnúðlax er einnig þekktur sem bleiklax og á ættir sínar að rekja í Kyrrahaf. Mun hann vera algengur þar, að því er fram kemur á vef stofunnar.

„Laxinn er auðþekktur á dökkum hringlaga blettum á sporðinum og fíngerðu hreistri. Hnúðlaxinn sem fannst í Patreksfirði var kynþroska hængur en hann þekkist m.a. á hnúð á bakinu,“ segir þar enn fremur.

„Hnúðlaxar sem flækjast um í Evrópu koma líklega frá Rússlandi en þar voru gerðar tilraunir um 1960 til að sleppa hnúðlaxaseiðum í ár á Kólaskaga. Talið er að þessi stofn hafi dreift sér að einhverju leyti og vísbending er um að hann sé að ná fótfestu í nokkrum ám í Noregi.“

Sjá nánar á vef Náttúrustofunnar.

Eva Dögg Jóhannesdóttir, meistaranemi í líffræði, Margrét Thorsteinsson, starfsmaður Náttúrustofu Vestfjarða, og Anne Cochu dýralæknanemi. Ljósmynd/Náttúrustofa Vestfjarða

• Blogga um frétt