Mexíkóski eiturlyfjabaróninn Joaquin „El Chapo“ Guzman rétt slapp undan lögreglu fyrir nokkrum dögum, slasaður á fæti og í andliti. Ævintýralegur flótti hans úr fangelsi komst í heimsfréttirnar fyrr á árinu en nú segja yfirvöld að „hiti sé að færast í leitina“.

Guzman braust út úr Altiplano-öryggisfangelsinu í nágrenni Mexíkóborgar, í júlí. Þá hafði hann verið bak við lás og slá í sautján mánuði. Lögreglan leitar hans aðallega í norðvesturhluta landsins í kjölfar upplýsinga frá stjórnvöldum annars lands. 

„Vegna þessara aðgerða og til að komast hjá handtökum, lagði hann á flótta í flýti nýlega og fengum við upplýsingar um að hann hefði slasast á fæti og andliti,“ segir í yfirlýsingu frá mexíkóskum stjórnvöldum. Ljóst er að lögreglan komst ekki að Guzman, heldur að hann hafi slasast er hún nálgaðist. 

Guzman er forsprakki Sinaloa-eiturlyfjahringsins og hefur verið fangelsaður tvisvar og náð að flýja jafn oft. Þann 11. júlí í ár fór hann niður um gat í gólfi fangaklefa síns og þaðan út í gegnum göng. 

Guz­mán er tal­inn einn hættu­leg­asti glæpa­maður Mexí­kó og þótt víðar væri leitað. Hann stýr­ir Sinaloa-eit­ur­lyfja­hringn­um sem dreg­ur nafn sitt af héraðinu þar sem hann var stofnaður. Sinaloa ann­ast stór­an hluta alls heróín­inn­flutn­ings til Banda­ríkj­anna en glæpa­hóp­ur­inn er einnig stór­tæk­ur í kókaín­sölu sem og sölu á öðrum ólög­leg­um efn­um. Guz­mán er einnig þekkt­ur fyr­ir að hafa skipu­lagt drjúg­an hluta þeirra morða sem fram­in hafa verið í Mexí­kó und­an­far­in ár í tengsl­um við bar­átt­una gegn skipu­lagðri glæp­a­starf­semi.

Flúði til fjalla

Bandarísk yfirvöld, sem einnig hafa aðstoðað við leitina, telja að Guzman hafi flúið til fjalla í heimahéraði sínu, Sinaloa, eftir að hann slapp úr fangelsinu. Guzman, sem er 58 ára, er talinn njóta stuðnings meðal íbúa á svæðinu og það auðveldi honum að fara huldu höfði. Bandarísk stjórnvöld vonast til þess að með samvinnu við mexíkósk yfirvöld megi fanga Guzman og framselja hann til Bandaríkjanna. 

Bandaríska sjónvarpsstöðin NBC segir að mexíkóskir hermenn hafi komist í námunda við Guzman í síðustu viku eftir að hafa rakið merki úr farsíma. Samkvæmt þeim upplýsingum var Guzman í felum á búgarði í Sinaloa-héraði.

 NBC segir að herinn hafi gert áhlaup á búgarðinn, m.a. með þyrlum, en hafi orðið frá að hverfa vegna skothríðar frá félögum Guzmans. 

Herinn hafi þá komið að búgarðinum á jörðu niðri en þá var búgarðurinn mannlaus.

 Guzman var handtekinn á lúxus-setri sínu árið 2013. Hans hafði þá verið leitað í þrettán ár. 

Í síðustu viku var birt enn eitt myndskeiðið af flóttanum mikla í júlí í sumar. AFP-fréttastofan segir að á því megi heyra hávær högg rétt áður en Guzman hvarf ofan í holuna í klefa sínum og út í gegnum göngin. Einnig hefur komið fram að það hafi tekið fangaverði 40 mínútur að fara inn í klefann, frá því að eiturlyfjabaróninn fór niður um gatið. Meira en tíu fangaverðir voru handteknir eftir flóttann og hafa verið ákærðir fyrir að hafa aðstoðað Guzman.

Guzman var handtekinn í fyrsta sinn árið 1993. Honum tókst hins vegar að sleppa úr fangelsi árið 2001 með því að fela sig í þvottakörfu.

Joaquin Guzman Loera leiddur fyrir dómara í Mexíkó árið 2014. Hann var í fangelsi í 17 mánuði. Svo flúði hann með ævintýralegum hætti. AFP

Tengdar fréttir

Eiturlyfjabarón á flótta

Bróðir forsetans í lífstíðarfangelsi

• Áfrýjar lífstíðarvist í „gúlagi“
• „Sá stutti“ í lífstíðarfangelsi
• „El Chapo“ sakfelldur í New York
• Sagður hafa nauðgað ungum stúlkum

» Fleiri tengdar fréttir

• Blogga um frétt