Morðingi hinnar ungu Becky Godden er „útsmoginn“ og „undirförull“ að mati dómarans sem dæmdi hann í dag í lífstíðarfangelsi fyrir morðið.
Refsing morðingjans Christofers Halliwell var ákveðin af dómara í Bristol á Bretlandseyjum. Hann mun aldrei verða frjáls ferða sinna aftur þar sem hann afplánar nú þegar dóm fyrir morð á annarri stúlku. Þann dóm hlaut hann fyrir fjórum árum. Talið er mögulegt að Halliwell hafi myrt fleiri konur og þrýsta lögregluyfirvöld nú á hann að segja frá svo upplýsa megi um málin.
Halliwell er 52 ára leigubílstjóri.
Fyrra morðið sem hann var sakfelldur fyrir átti sér stað í Swindon árið 2011. Hann tók Sian O’Callaghan, 22 ára konu, upp í leigubíl sinn er hún var á heimleið eftir að hafa eytt kvöldinu á næturklúbbi. Hann stakk hana í höfuðið og kyrkti hana. Líkið fannst fáklætt í vegkanti í Oxford-skíri.
Halliwell var dæmdur sekur um morðið á Becky Godden fyrir tveimur vikum en það framdi hann árið 2003. Godden var vændiskona og Halliwell kynntist henni er hann ók leigubíl sínum í Swindon. Í janúar árið 2003 hafði hann mök við hana, kyrkti hana og gróf lík hennar á akri.
Lýst var eftir Godden á sínum tíma en það var ekki fyrr en Halliwell var handtekinn vegna hvarfs O’Callaghan sem grunur vaknaði að hann bæri einnig ábyrgð á dauða Godden. Halliwell sagði lögreglunni frá því hvar lík O’Callaghan væri og einnig hvar hann hefði grafið lík Godden átta árum áður.
Lögreglan telur mjög líklegt að Halliwell beri ábyrgð á fleiri morðum. Hún segir að átta ár séu milli morðanna tveggja. Skoða þurfi hvað Halliwell hafðist við á þeim árum.
Í frétt Guardian um málið segir að á níunda áratugnum, er Halliwell var í fangelsi vegna annarra brota, spurði hann klefafélaga sinn hversu margar konur þyrfti að myrða til þess að vera flokkaður sem raðmorðingi.