Andrea Constand, sem sakaði Bill Cosby um að byrla sér lyf og misnota kynferðislega árið 2004, bar vitni fyrir dómi í réttarhöldum í dag. Réttarhöldin hófust í gær en verði Cosby dæmdur sekur gæti hann átt yfir höfði sér allt að 10 ára fangelsi.
„Ég vildi að þetta myndi hætta,“ sagði hin 44 ára gamla Andrea Constand við réttarhöldin í dag þar sem hún rifjaði upp kvöldið á heimili Cosby 13 árum fyrr.
Constand leit á Cosby sem vin sinn og læriföður áður en hann misnotaði hana. Hún segir að hann hafi gefið henni töflur og vín áður en hann misnotaði hana kynferðislega á sófanum eftir að hún hafði spurt hann ráða er vörðuðu starfsframa hennar.
„Ég sagðist treysta þér,“ sagði Constand að hún hefði sagt við Cosby á sínum tíma. Um hálftíma eftir að hún tók töflurnar sagði Constand að hún ætti erfitt með að hreyfa sig og sæi tvöfalt. Eftir að hafa misst meðvitund í stutta stund vaknaði hún við að Cosby var að koma við hana, kom fram í réttarhöldunum.
„Ég reyndi að hreyfa hendur og fætur en var alveg frosin,“ sagði Constand skjálfrödduð.
Vitnisburður hennar er lykilatriði í málinu en sérfræðingar vestanhafs segja að hann muni hafa mikið að segja um það hvort Cosby verði dæmdur sekur. „Ég skammaðist mín og var mjög ringluð,“ sagði Constand.
Cosby, sem er 79 ára, hefur neitað þessum ásökunum. Að sögn lögfræðings hans samþykkti Constant að stunda með honum kynlíf.