Störf björgunarsveita hafa gengið vel á öskufallssvæðinu suðaustanlands í dag. Um 100 manns frá björgunarsveitum á Hvolsvelli, höfuðborgarsvæðinu og Árnessýslu hafa tekið þátt. Aðallega er um að ræða smölun á fé og hrossum og aðra aðstoð við bændur.
Í tilkynningu frá Landsbjörgu kemur fram að einnig hafi björgunarsveitir tekið þátt í flutningi á vatni, þær hafa límt fyrir glugga, þétt hús og þrifið.
Árangur smölunar var nokkuð góður, mikið af fé og hrossum náðist í hús. Reyndist ástandið á búpeningnum mun betra en búist hafði verið við, að sögn Landsbjargar.