Hreinsunarátak hófst í hrauninu sunnan og vestan við Straumsvík í morgun og tóku fjölmargir til hendinni við hreinsunarstarfið, þar á meðal börn í Áslandsskóla, Hraunvallaskóla og Hvaleyrarskóla. Í dag er dagur íslenskrar náttúru.
Átakið er á vegum Hraunavina í samvinnu við sjálfboðaliðasamtökin SEEDS, grunnskóla, fyrirtæki og stofnanir í Hafnarfirði og ýmsa aðra sjálfboðaliða.
Átakinu verður framhaldið á morgun og eru áhugasamir Hafnfirðingar og nærsveitungar hvattir til að koma í Straum við Straumsvík kl. 10 eða kl. 13. Þar verður skipt í hópa og eru áhugasamir hvattir til að taka með sér sorppoka.