Innlent | mbl | 26.10.2016 | 16:27 | Uppfært 27.10.2016 14:39

Hælisleitendur komnir í Víðines

Frá Víðinesi þar sem hælisleitendur búa nú tímabundið. mbl.is/Árni Sæberg

Um fjörutíu hælisleitendur fluttu á mánudag inn í hús á Víðinesi sem Útlendingastofnun hefur tekið á leigu tímabundið. Þeir sem þar búa fjarri annarri byggð en hafa kost á einni skutluferð í Mosfellsbæ á dag til að komast í strætósamgöngur.

Rýma þurfti á dögunum hús í Bæjarhrauni þar sem hælisleitendur hafa búið, vegna veggjalúsar. Í kjölfarið var gamalt hjúkrunarheimili á Víðinesi í eigu borgarinnar leigt undir hælisleitendurna. Þórhildur Ósk Hagalín, upplýsingafulltrúi Útlendingastofnunar, segir að um tímabundið úrræði sé að ræða en stofnunin sé með húsið á leigu til áramóta.

Frétt Mbl.is: Munu rýma Bæjarhraun

Húsið er langt frá næstu byggð og á svæðinu er hvorki þjónusta né aðgengi að almenningssamgöngum. Þórhildur Ósk segir að boðið verði upp á skutluþjónustu frá Víðinesi inn í Mosfellsbæ til að tengja við strætisvagnasamgöngur á hverjum virkum degi.

„Það er svona skutla að morgni og svo síðdegis aftur til baka frá Mosfellsbæ niður í Víðines,“ segir hún.

Veggjalús fannst á tveimur hæðum í húsnæði fyrir hælisleitendur í Bæjarhrauni í Hafnarfirði sem hefur verið fyrsti viðkomustaður þeirra. Um miðjan mánuðinn sagði Þórhildur Ósk við Morgunblaðið að húsið yrði ekki tekið strax í notkun eftir að meindýraeyðir hefði lokið störfum þar, þar sem það tæki tíma að fá leyfi til starfseminnar, meðal annars frá slökkviliði og heilbrigðiseftirliti.

Frétt Mbl.is: Veggjalús í húsnæði hælisleitenda

Undanfarið hafa um hundrað hælisleitendur gist á hótelherbergjum víðs vegar um borgina. Þórhildur Ósk segir að þar sem rýma hafi þurft Bæjarhraunið telji hún ólíklegt að fækkað hafi mikið í þeim hópi sem býr á hótelum.

Fyrirsjáanlegt er að minna framboð verði af hótelherbergjum nú í byrjun nóvember, ekki síst vegna tónlistarhátíðarinnar Iceland Airwaves. Þórhildur Ósk segir Útlendingastofnun ekki bóka mikinn fjölda herbergja fram í tímann. Ef framboðið sé minna á hótelum og gistiheimilum sé stundum eitthvað laust í öðrum úrræðum þegar úr þeim týnist og stundum sé leitað út fyrir höfuðborgarsvæðið.

Í ítrustu neyð ef skyndilega kæmi stór hópur hælisleitenda á sama tíma og húsnæðisúrræði eru erfið myndi Útlendingastofnun óska eftir fjöldahjálparstöð en það sé þó ekki nokkuð sem hún geri ráð fyrir nú.