Lögreglan á höfuðborgarsvæðinu var kölluð að húsnæði í Seljahverfi í Breiðholti á fjórða tímanum í dag en þar höfðu átök brotist út milli tveggja karlmanna. Mennirnir voru vopnaðir hnífum og veittu hvor öðrum alvarlega áverka. Mennirnir voru fluttir á slysadeild með sjúkrabifreiðum.
Mennirnir, sem eru erlendir ríkisborgarar, voru undir áhrifum áfengis. Samkvæmt upplýsingum frá lögreglu var um innbyrðis átök mannanna að ræða. Aðrir komu ekki við sögu í þessum átökum.
Íbúar í fjölbýlishúsi þar sem mennirnir búa höfðu samband við lögreglu vegna málsins. Málið er í rannsókn.