Dagur B. Eggertsson, borgarstjóri í Reykjavík, hefur sent Bill de Blasio, borgarstjóra New York, samúðarskeyti vegna árásarinnar í borginni í gær þegar átta létu lífið og ellefu særðust.
Samúðarskeytið er svohljóðandi á íslensku:
„Kæri borgarstjóri,
Fyrir hönd allra Reykvíkinga vil ég votta þér mína dýpstu samúð vegna þeirra voveiflegu atburða sem áttu sér stað í New York í gær.
Hugur okkar er hjá fórnarlömbunum, íbúum New York og öllum þeim sem eiga um sárt að binda vegna þessa miskunnarlausa ofbeldis. Borgir heimsins standa sameinaðar gegn slíkum hryðjuverkum.“