Willum Þór Þórsson heilbrigðisráðherra hefur áhyggjur af fjölda kíghóstasmita sem greinst hafa að undanförnu en segir sóttvarnarlækni vinna að vel að málinu. Hann segir enga ástæðu til að þvinga fólk til að fara í bólusetningu.
„Auðvitað hefur maður áhyggjur af því en það vill til að sóttvarnarlæknir hefur tekið þetta mjög föstum tökum og smitrakning gengur vel - að halda utan um þessi smit sem hafa komið upp,“ segir Willum Þór í samtali við mbl.is að loknum ríkisstjórnarfundi.
Eins og mbl.is greindi frá í gær hefur kíghósti greinst hjá sautján einstaklingum og flestir þeirra sem hafa greinst eru af höfuðborgarsvæðinu.
Willum segir að það þurfi að skerpa á bólusetningum hjá aldurshópnum 4-14 ára, en segir aðspurður að það ætti ekki að skikka fólk í bólusetningar.
„Okkur hefur gengið mjög vel og tekist mjög vel til með bólusetningar á Íslandi, verið með hátt bólusetningarhlutfall. Þannig það er ekkert tilefni til að fara í slíka umræðu,“ segir Willum.