Rétt um klukkan hálft tólf í morgun setti veiðimaður í stóran lax í Blöndu. Nánar tiltekið á Breiðu norður. Undir var svartur Frances hálf tomma. Veiðimaðurinn sem hélt á fimmtán feta tvíhendunni var Gísli Vilhjálmsson. Honum til aðstoðar var svo Þorsteinn Hafþórsson. 

 Fast var tekið á fiskinum en hann sýndi sig ekki fyrr en eftir tæpan hálftíma og þá úti á miðri Breiðunni. „Ég sagði strax við Gísla að þetta væri hundraðkall. Ég var búinn að stilla honum upp alveg við Gjána en brúnin á henni er stórhættuleg þegar menn takast á við stóra fiska. Einu sinni ætlaði hann niður á brot en Gísli stöðvaði hann. Ég er alveg brútal og læt menn nota græjur sem geta ráðið við öfluga fiska,“ sagði Þorsteinn Hafþórsson leiðsögumaður í samtali við Sporðaköst skömmu eftir að þeir félagar voru búnir að landa þessari miklu skepnu. Það er enn merkilegra að hugsa til þess að þetta var hrygna. En algengara er að stærstu laxarnir séu hængar. 

Viðureignin stóð í þrjú kortér og var tekið fast á laxinum allan tímann. Laxinn mældist 110 sentímetrar og fylgir með myndband sem staðfestir mælinguna. Það er í anda þess sem Sporðaköst hafa verið að kalla eftir. Á myndbandinu sem fylgir fréttinni sést greinilega að fiskurinn stendur 110 sentímetra. Gísli sem slóst við laxinn blandaði sér í þetta. „Ég vil að það sé alveg skýrt að Þorsteinn setti í laxinn. Hann kastaði og setti í hann og rétti mér stöngina og sagði, hann er á,“ sagði Gísli. Það er ekki á hverjum degi sem veiðimenn vilja leiðrétta hluti af þessu tagi. En það er hér með komið á hreint.

Gísli Vilhjálmsson tannlæknir með hrygnuna stæðilegu sem er ein sú stærsta sem veiðst hefur á Íslandi á öldinni. Ljósmynd/Þorsteinn Hafþórsson

Þetta er einn af stærstu löxum sem veiðst hafa á þessari öld. Sumarið 2015 veiddi Sturla Birgisson 112 sentímetra lax í Vatnsdalsá og í sömu á veiddi Ingólfur Davíð Sigurðsson 115 sentímetra lax árið 2006. Einhverjir fleiri fiskar kunna að hafa veiðst á öldinni í þessum stærðarflokki en líkast til er þetta stærsta hrygna sem veiðst hefur á þessari öld á Íslandi.

Eftir ábendingu frá áhugasömum lesanda Sporðakasta var rifjað upp að Ásgeir Heiðar veiddi 115 sentímetra hrygnu í Laxá í Aðaldal snemma í júlí 2013 á Hornflúð. Það er án efa stærsta hrygna og líklegast lax sem veiðst hefur á öldinni.

Það er líka áhugavert í þessu samhengi að Róbert Haraldsson setti í mjög stóran fisk á sama stað í gær og missti hann eftir klukkutíma. Hann sagðist aldrei hafa sett í svo stóran fisk áður.

Sporðaköst óska þeim Gísla og Þorsteini til hamingju með þennan mikla feng.

Fréttin var uppfærð klukkan 20:19 með viðbótar upplýsingum.

Gísli og Þorsteinn segja málið allt hafa verið samvinnuverkefni frá A til Ö. Steini setti í hann og Gísli slóst við hann og saman lönduðu þeir laxinum. Ljósmynd/Starir

Tengdar fréttir

Hundraðkallar

Tárfelldi þegar kassinn var opnaður

• Tröllin sem ekki veiddust og eftirpartý
• Katrín Tanja landaði þeim stærsta
• Stærsti lax úr Grímsá í áratugi
• Hundraðkallarnir hrúgast inn

» Fleiri tengdar fréttir

• Blogga um frétt

Seinustu hundraðkallar sumarsins