Fastur liður á matarvefnum á laugardagsmorgnum eru Húsó-uppskriftirnar sem koma úr hinu fræga eldhúsi í Hússtjórnarskólanum við Sólvallagötu. Nú er það dýrðlegt Húsó-nautakjötsalat með límónu- og engifersósu sem er fullkomið að bera fram á laugardags- eða sunnudagskvöldi og njóta. Marta María Arnarsdóttir skólameistari deilir hér uppskriftinni að nautakjötssalatinu með lesendum matarvefsins sem hún lofar að eigi eftir að slá í gegn í næsta matarboði.
Marta María Arnarsdóttir skólameistari Hússtjórnarskólans við Sólvallagötu heldur áfram að gleðja lesendur matarvefsins með girnilegum og fallegum uppskriftum.
mbl.is/Eggert Jóhannesson
Roastbeef
- Ofnsteikt nautakjöt, þá er valinn meyr biti úr læri eða afturhrygg.
- 1 ½ – 2 kg nautavöðvi
- Salt og pipar eftir smekk
- Matarolía eftir smekk
Aðferð:
- Penslið vöðvann með olíu og nuddið salti og pipar vel á kjötið.
- Hitið olíu á pönnu og snöggbrúnið kjötið á öllum hliðum við háan hita.
- Setjið kjötið á rist í ofnskúffu og steikið í ofni við 150-160°C í 40-60 mínútur á kíló eða þar til kjarnhitinn er um 55°C.
- Athugið að láta steikina hvíla utan ofns í 10-20 mínútur áður en hún er skorin.
- Skerið í þunnar sneiðar með áleggshníf.
- Marínerið í sólarhring í kæli, sjá uppskrift fyrir neðan.
- Penslið sneiðarnar með maríneringunni.
- Setjið ferskt salat í fat og setjið kjötið sett yfir.
- Skerið rauðlaukinn.
- Skerið kokkteiltómatana í tvennt og setjið yfir.
- Setjið ristuð sesamfræ yfir salatið í lokin.
- Skreytið með rifsber ef vill eða því sem hugurinn girnist.
- Berið fram með salatsósunni, sjá uppskrift fyrir neðan.
Marínering
- 4 hvítlauksgeirar saxaðir
- 2 tsk. salt
- 2 tsk. pipar
- 2 tsk. rifinn límónubörkur
- 4 msk. sweet chili-sósa
- 3 tsk. sesamolía
Aðferð:
- Setjið allt hráefnið í skál og hrærið vel saman.
- Geymið í ísskáp fyrir notkun.
Sósa með salatinu
- 4 msk. límónusafi
- 2 tsk. rifið engifer
- 1 saxaður skarlottulaukur
- ½ tsk. sjávarsalt
- 2 msk. sojasósa
- 2 dl ólífuolía
- 3 tsk. sesamolía
- ½ dl ristuð sesamfræ
Aðferð:
- Blandið öllu hráefninu saman í skál og hrærið.
- Geymið sósuna í kæli fyrir notkun.