Áfrýjunardómstóll í Svíþjóð staðfesti í dag, að þrír forsvarsmanna sænsku skráaskiptisíðunnar The Pirate Bay skuli sæta fangelsisrefsingu og greiða sekt. Mildaði dómurinn fangelsisrefsinguna en hækkaði sektina og nemur hún 46 milljónir sænskra króna, um 760 milljónum króna.
Fredrik Neij, 32 ára, var dæmdur í 10 mánaða fangelsi, Peter Sunde, 32, í 8 mánaða fangelsi og Carl Lundström, 50 ára, í 4 mánaða fangelsi. Dómur yfir fjórða manninum, Gottfrid Svartholm Warg, verður kveðinn upp síðar en hann gat ekki komið fyrir réttinn nú vegna veikinda.