Ísraelsher herti í dag á miklum hernaðaraðgerðum gegn Palestínumönnum á Gasa, en 114 Palestínumenn, þar á meðal mörg börn, hafa látist í árásum Ísraela þar undanfarnar tvær vikur. Í dag hófu Ísraelar aðgerðir í bænum Beit Lahiya, en tugir skriðdreka og jarðýtna á vegum hersins fóru inn í bæinn.
Allnokkrar götur og engi í nágrenninu höfðu einnig verið tætt í sundur af hernaðartækjum Ísraela.
Eyal Eizenberg, hershöfðingi í Ísraelsher, sagði í útvarpi hersins að hermenn hans hefðu mætt allnokkurri andspyrnu þegar þeir fóru inn í Beit Lahiya, sem er norður af Jabaliya flóttamannabúðunum, sem Ísraelar hafa haldið uppi árásum á undanfarnar vikur.
„Sprengjum var varpað á okkur og einnig eldflaugum sem beitt er gegn skriðdrekum,“ sagði hershöfðinginn. Hann sagði að einnig hefði verið skotið að hermönnunum.
Í herútvarpinu kom fram að herþyrlur hefðu sveimað yfir bænum til stuðnings skriðdrekunum.
Palestínsk öryggisyfirvöld sögðu að félagi í hernaðarvæng Hamas samtakanna hefði verið drepinn og að minnsta kosti tveir hefðu særst þegar þyrla skaut flugskeyti að Beit Lahiya. Sögðu þau að hinir særðu væru þungt haldnir.