Bandaríski öldungadeildarþingmaðurinn Patrick Leahy sem er demókrati frá Vermontríki hefur kvartað yfir því að bandaríska alríkislögreglan, FBI, sé að njósna um hópa sem eru andsnúnir stríðinu í Írak. Telur Leahy að friðarhóparnir Thomas Merton Centre for Peace and Justice, hópur í trúfélagi kvekara og kaþólskt félag í Pennsylvaníu og hópur eldri kvenna sem nefna sig „Reiðar ömmur” (e. Raging Grannies) séu allir undir eftirliti.
„Því í ósköpunum er FBI að njósna um löghlýðna borgara þessa lands þó að þeir séu mótfallnir stríðinu í Írak,” sagði Leahy og vitnaði í innanhússskýrslur FBI.
Robert Mueller forstjóri FBI sagði að ekki væri verið að fylgjast með reiðum ömmum eða friðarsinnuðum kvekurum (e. Quakers) og að eftirlitið með Thomas Merton Centre hefði verði í tengslum við annað mál.