Forsætisráðherra Frakklands virðist ekki ætla að láta undan kröfum mótmælenda

Forsætisráðherra Frakklands, Dominique de Villepin, virðist ekki ætla að breyta umdeildri löggjöf um atvinnumál ungs fólks, þrátt hótanir verkalýðsleiðtoga og stúdenta í landinu um allsherjarverkfall. Nái löggjöfin fram að ganga verður fyrirtækjum heimilt að segja upp fólki undir 26 ára aldri án sérstakrar ástæðu á fyrstu tveimur starfsárum þess hjá viðkomandi fyrirtæki.

Villepin sagði í viðtali við franskt tímarit fyrir ungmenni, að láta yrði á löggjöfina reyna, en hægt væri að lagfæra hana. Verkalýðsfélög hafa gefið ríkisstjórninni frest fram á kvöld í dag til að hætta við löggjöfina.

Fleiri en 160 voru handteknir í fyrradag í miklum mótmælum vegna löggjafarinnar, en til átaka kom undir lokin eftir að þau höfðu farið friðsamlega fram um daginn. Verkalýðsleiðtogar segja löggjöfina bjóða upp á að vinnuveitendur misnoti unga starfsmenn þar sem þeir geti rekið þá hvenær sem þeim sýnist án ástæðu. Ríkisstjórnin segir aftur á móti að löggjöfin muni draga úr atvinnuleysi ungs fólks.

Um 1,5 milljón mótmælenda lét í sér heyra í um 150 samkomum víðs vegar um Frakkland í fyrradag. Fyrirhugað allsherjarverkfall mun skella á þann 23. mars, þ.e. eftir þrjá daga. Fréttavefur BBC sagði frá þessu.

• Blogga um frétt