Hallgrímur Helgason, rithöfundur og myndlistarmaður, opnaði einkasýningu í menningarhúsinu Norðurbryggju í Kaupmannahöfn á laugardaginn. Sýningin stendur fram til 26. maí en á opnuninni mætti fjöldinn allur af fólki. 

Sýningin er á tveimur hæðum menningarmiðstöðvarinnar, sem staðsett er nærri Nýhöfn, og samanstendur af nýjum málverkum og verkum unnum á pappír undir yfirheitinu „Gruppeportræt af selvet“ eða „Hópmyndir af sjálfi“.

Á jarðhæð sýnir Hallgrímur málverk unninn á síðustu tveimur árum sem hann kallar margfaldar sjálfsmyndir.

„Þetta eru allt sjálfsmyndir. Ekki hefðbundnar sjálfsmyndir heldur hópmyndir af þeim mörgu og mismunandi karakterum sem saman mynda sjálf listamannsins. Þær eru allt frá því að vera sexfaldar og upp í að vera sextánfaldar sjálfsmyndir. Það er alltaf partý þarna inni, sko,“ segir Hallgrímur Helgason.