Segir Grikki verða að vera áfram á evrusvæðinu

Grikkland verður að vera áfram á evrusvæðinu til þess að lifa af efnahagserfiðleikana sem landið gengur í gegnum að sögn fjármálaráðherra landsins, Yannis Stournaras. Hann segir að Grikkir verði að koma á þeim niðurskurði sem önnur evruríki krefðust af þeim vegna þess að aðild Grikklands að evrusvæðinu væri gríðarlega mikilvæg.

„Við verðum að halda okkur á lífi og vera áfram undir regnhlíf evrunnar vegna þess að það er eini valmöguleikinn sem getur bjargað okkur frá fátækt sem við höfum ekki þekkt,“ er ennfremur haft eftir Stournaras á fréttavef breska dagblaðsins Daily Telegraph.

Hann bendir á ef Grikkir komi ekki þeim aðhaldsaðgerðum í gang sem krafist er sé veru þeirra á evrusvæðinu ógnað. „Við búum við dýrasta velferðarkerfi á evrusvæðinu. Við getum ekki haldið því úti lengur með lánuðum fjármunum.“

Þá segir í fréttinni að Grikkland eigi eftir að finna fyrir auknum þrýstingi á næstunni en samkvæmt nýlegri þýskri skýrslu þarf landið að skera niður í ríkisrekstri um 14 milljarða evra á næstu tveimur árum til viðbótar við fyrri niðurskurð en það sé 2,5 milljörðum evra meira en áður hafi verið talið.

• 1 blogg um fréttina

Bloggað um fréttina

• Páll Vilhjálmsson: Með evru sjá Grikkir til sólar árið 2020