Leigusamningur Tösku- og hanskabúðarinnar á Bergstaðastræti 4 rennur út þann 31. júlí og óvíst er hvort starfsemin verði þar áfram. „Við erum bara að leita að leigjendum,“ segir Bjarni Hákonarson, framkvæmdastjóri á Hótel Óðinsvéum.
Húseignin er í eigu Gamma ehf. en það félag á jafnframt rekstrarfélagið sem rekur Hótel Óðinsvé á Þórsgötu 1. Hótel Óðinsvé leigir út hótelíbúðir á efstu hæð Bergstaðastrætis 4.
Aðspurður hvort samningur Tösku- og hanskabúðarinnar verði framlengdur segir Bjarni það koma til greina. „Ef um semst,“ segir hann. Þá segir hann samninga um húsaleigu vera trúnaðarmál á milli aðila en bætir við að Tösku- og hanskabúðin gæti verið á leiðinni út.
Bjarni segir að framkvæmdir á reitnum séu ekki fyrirhugaðar heldur eigi einungis að fá nýjan leigjanda í húsnæðið. Lóðin við hliðina á, Bergstaðastræti 2, er einnig í eigu Gamma ehf. og hefur áður verið rætt um mögulegar framkvæmdir þar. Bjarni segir ekkert á teikniborðinu. „En það getur vel verið að nýr leigutaki myndi vilja breyta húsnæðinu. Það yrðu þá einu framkvæmdirnar. Við stöndum ekki fyrir neinu,“ segir hann.
Tösku- og hanskabúðin var stofnuð 3. október 1960 af Ingibjörgu Jónsdóttur og Þorgrími Brynjólfssyni. Hún hefur alla tíð verið til húsa á horni Skólavörðustígs og Bergstaðastrætis. Gréta Oddsdóttir, eigandi verslunarinnar, vildi ekki tjá sig um málið að svo stöddu.
Gamma ehf. er í 50% eigu Pama ehf. og í 50% eigu Punds ehf., skv. Creditinfo. Pama ehf. er í eigu Vallaness ehf., sem er í 100% eigu Bergljótar Þorsteinsdóttur fv. flugfreyju.
Pund ehf. er í 100% eigu Hannesar Hilmarssonar, forstjóra Air Atlanta. Bergljót er gift Magnúsi Stephensen, viðskiptafélaga Hannesar.